Áheitan frá Nordisk Indre Missions Råd til stjórnir og miðlar i Norðurlondum.
Aðalskrivarar og leiðarar frá 10 norðurlendskum missiónsrørslum hava verið savnaðir í Føroyum í døgunum 19.-22. august, og hava m.a. umrøtt støðuna hjá teimum kristnu í stríðnum í Sýria og Irak. Tey samdust um hesa felags áheitan:
· Stríðið í Sýria og Irak er vorðið til nakað, sum líkist eini útreinsan av kristna minnilutanum. Túsundtals kristnar familjur eru seinastu mánaðirnar flýddar undan Islamiskum Stati (IS), og orsøk er til at óttast fyri lívinum hjá teimum kristnu. Mong eru longu dripin.
· Vit sóknast eftir, at politikarar og fjølmiðlar í Norðurlondum veruliga geva hesum gætur. Vit sakna greiðar politiskar røddir, ið vilja vera týðiligir talsmenn fyri kristnu minnilutarnar. Nógvir politikarar í Norðurlondum hava sýtt fyri serliga at seta fokus á støðuna hjá teimum kristnu. Í tí sambandinum hava serliga tvær grundgevingar verið. Onnur er pragmatisk og sigur, at tað er betri at fokusera á trúarfrælsi fyri øll heldur enn at taka ein ávísan bólk framum. Hin grundgevingin er strategisk og sigur, at tað kann økja um trupulleikarnar hjá teimum kristnu, um vit taka tey burturúr sum ein bólk við serligum trupulleikum. Nú síggja vit støðuna at vera so álvarsliga, at hvørgari av hesum grundgevingunum er høpi í longur. Í tí sambandi sóknast vit eftir, at ráðharrar og stjórnarleiðarar úr Norðurlondum týðiliga og bart út vilja taka trupulleikan fram í millumtjóða mótum og koma við einari veruligari strategi fyri økið. Tað er avgerandi, at vit fáa skjalprógvað ágangin og leggja greiðar ætlanir, hvussu vit kunnu koma teimum neyðstøddu til hjálpar og virka við til, at friður og sátt kunnu verða í Miðeystri.
· Tað politiska átakið og ansurin hjá miðlunum eigur sjálvandi at fevna um øll, sum líða í kreppuni, sum er. Vit eru eisini stúrin vegna yazidi-minnilutan, shiamuslimar og aðrar bólkar, sum óttast fyri sínum heimi og lívi. Men tey kristnu mugu ikki verða gloymd! Álvarsliga støðan hjá teimum er vorðin gjørd ósjónlig, tí tey eru trýst av islamiskari fundamentalismu øðrumegin og vesturlendskari sekularismu hinumegin.
· Vit binda okkum sjálv til at taka stig til, at vit í okkara rørslum bæði kunnu veita fíggjarliga hjálp, forbøn og tala søkina hjá kristnu minnilutunum í hesi støðuni. Nógvir kristnir einstaklingar, meinigheitir og felagsskapir gera longu djørv átøk fyri at hjálpa teimum forfylgdu kristnu í Miðeystri. Tað eru vit takksom fyri. Vit eru eisini takksom fyri avrikini hjá neyðhjálparfelagsskapum og stjórnum fyri at koma neyðstøddum flóttafólkum til hjálpar. Hetta arbeiðið má styrkjast.
Undirskrivað áheitanina hava:
Stefan Holmström, Evangeliska Fosterlandsstiftelsen, Sverige
Erik J. Andersson, Evangelisk Luthersk Mission, Sverige
Jens Ole Christensen, Luthersk Mission, Danmark
Thomas Bjerg Mikkelsen, Indre Mission, Danmark
Jukka Niemelä, The Lutheran Evangelical Association of Finland
Erik Furnes, Indremisjonsforbundet, Norge
Øyvind Åsland, Norsk Luthersk Misjonssamband, Norge
Anne Birgitta Langmoen Kvelland, Normisjon, Norge
Øssur Kjølbro, Kirkjuliga Heimamissiónin, Føroyar
Ragnar Gunnarson, Samband Íslenskra Kristniboðsfélaga, Ísland
