HONDBÓLTUR
Óansæð, hvussu tað spælir av í FM-finalunum komandi dagarnar, kann staðfestast, at Tjaldur hevur verið stóra stjørnuskotið í hondbóltinum í vetur. Liðið vann í fjør 1. deild og spælir nú finalu í Sunset-kappingini ímóti Stjørnuni, sum síðstu tvey árini hevur verið meistari og eisini er trífaldur steypavinnari.
Men hóast sera ymiskt útgangsstøði, hava liðini sum heild verið jøvn. Í landskappingini hava tey vunnið tvær ferðir í part á hvørjum øðrum, og samlaði málmunurin er 101-100 til Stjørnuna, sum haraftrat vann við tveimum málum á Tjaldri í steypafinaluni í ár.
Hvussu verður í finalunum, er sjálvandi ilt at meta um, men óivað hevur dagsformurin alt at siga, tí liðini hava fleiri ferðir vunnið rættiliga greitt á hvørjum øðrum. Fyrst vann Stjørnan úti 21-19 og heima 34-24, og síðani vann Tjaldur úti 22-17 og heima 35-29.
Eftir stendur so spurningurin, um royndirnar hjá Stjørnuni verða drúgvari enn tað nýggja hjá Tjaldri, sum framvegis tykist vera undir uppbygging. Tað vita vit annaðhvørt longu páskaaftan ella ikki fyrr enn annan páskadag, og í øllum førum eru tey sera spent í bæði Klaksvík og Runavík.
