- Vinnumálaráðið hevur almannakunngjørt, at verkætlanin skal vera liðug í 2006, og um tað heldur, eri eg ógvuliga fegin og væl nøgdur, sigur Vilhelm Johannesen, tingmaður í norðoyggjum fyri Javnaðarflokkin.
Vilhelm Johannesen vísir víðari á, at týdningarmikið er at geva verkætlanini ta tíð, sum krevst, so almennu íløgurnar ikki gerast ov høgar.
Betra tunnlar til smáu bygdirnar
Vilhelm Johannesen vísir tó víðari á eitt hugskot, sum ikki hevur verið serliga sjónligt higartil, men sum samstundis er ein sera kostnaðarmikil ætlan.
Umframt at fáa fast samband millum Norðoyggjar og Eysturoynna, ynskir Vilhelm Johannesen at betra tunnlarnar til smáu bygdirnar norðanfyri Klaksvíkina.
- Tunnlarnir úr Klaksvík og norður til smábygdirnar norðanfyri eru í sera vánaligum standi, og átti hetta arbeiðið at verið knýtt at stóru verkætlanini um Leirvíksfjørð, sigur Vilhelm Johannesen. Grundgevingarnar eru tær, at bergholini eru gomul, lág og hava bert eina koyribreyt.
- Tunnlarnir eru frá 60´unum, og um allar bygdirnar í Norðoyggjum skulu njóta gott av Norðoyatunnlinum, er neyðugt at betra viðurskiftini til útjaðaran eisini, og hetta arbeiðið skuldi verið knýtt at undirsjóvartunnlinum.
Um Vilhelm Johannesen tekur munnin ov fullan við hesum útsøgnum miðskeiðis í eini verkætlan á umleið 400 mió. krónur umframt at talan í løtuni er um búskaparligar niðurgongutíðir, skal vera ósagt, men talan verður í øllum førum um stórar og kostnaðarmiklar ætlanir, um ynskir hansara skulu verða gingin á møti.
Upplýsingar vanta
Vilhelm Johannesen slær fast, at hann higartil er nøgdur við gongdina, og heldur hann ikki orsøk vera fyri atfinningarsomu røddunum viðvíkjandi keypi/ognartøku av jørðini í Klaksvík. Tó heldur hann lítið um upplýsingarviðurskiftini.
- Ein atfinning er vantandi upplýsingar til norðoyingar og Føroya fólk, og hetta eigur at betrast ongantíð ov skjótt, heldur Vilhelm Johannesen at enda.
