Eirikur Lindenskov
Tjóðveldisflokkurin buldrar fram í nýggjastu veljarakanningini. Frá skrædlvalinum í 2011, tá flokkurin misti tvey tingfólk og einans fekk 18,3 prosent av atkvøðunum, so stendur flokkurin úr til at ganga 8,4 prosenststig fram til 26,7 prosent. Hetta hevði verið metstórt úrslit, sum hevði givið Tjóðveldinum níggju tingsessir.
Sambandsflokkurin er størsti taparin í kanningini. Flokkurin missir 3,8 prosentstig og fer frá 24,7 til 20,9. Tað merkir, at flokkurin missir ein tingsess.
Fólkaflokkurin missir eisini nógv, 1,8 prosentstig. Flokkurin fer úr 22,5 prosentum niður í 20,7. Tað merkir, at flokkurin missir ein tingsess í mun til valið og tveir sessir havandi í huga, at Janus Rein er komin upp í flokkin. Her skal tó havast í huga, at Fólkaflokkurin hevur vunnið seg fram 3,5 prosentstig í mun til seinastu veljarakanning í september.
Hóast Javnaðarflokkurin gongur fram úr 17,8 til 19,3, so er talan um eina afturgongd í mun til kanningina í september. Her kann lesarin merkja sær, meðan Javnaðarflokkurin gongur 2,4 prosent aftur síðani seinastu kanning, so gongur Tjóðveldi 3,1 prosent fram sama tíðarskeið.
Støðan hjá Framsókn og Miðflokkinum broytist ikki nógv. Báðir flokkarnir standa til varðveita bæði síni um boð. Framsókn tykist at halda fast við báðar tingsessirnar, hóast Janus Rein fór úr flokkinum.
Hjá Sjálvstýrisflokkinum tykist støðan at vera stabilt vánalig. Flokkurin hevur í veljarakanningum síðani valið bara staðið til at fáa umboð valt tvær ferðir, meðan hann í fimm veljarakanningum hevur staðið til at rúka út úr løgtinginum.
Flokkurin fær í hesari kanningini einans 2,2 prosent, og tað ringasta úrslit síðani valið, tá flokkurin fekk 4,2 prosent.
Seinasta veljarakanningin í september gav flokkinum 4,5 prosent. Hetta var beint eftir, at Kári P. Højgaard varð koyrdur frá sum landsstýrismaður, og rokið um Skálafjarðatunnilin gav óiva flokkinum ta framgongd, sum tá var at síggja. Spurningurin er so, um hetta er gloymt, at veljarin velur Sjálvstýrisflokkin frá.
Í stuttum kann sigast, at samgongan, sum byrjaði valskeiði við at hava 57,8 prosent av veljarunum aftan fyri seg, nú bert hevur 46,7 prosent aftan fyri seg.
Hetta er triða veljarakanningin upp í slag sum gevur andstøðuni meirilutan. Seinasta veljarakanningin sum gav samgonguni meirilutan varð kunngjørd í Sosialinum 9. november í 2012.
