Hóast løgmaður sigur, at hann fær ikki undirtøku fyri at broyta skipanina soleiðis, at landsstýrisfólk, sum taka sæti aftur á tingi eftir at hava sitið í landsstýrinum, ikki skulu bæði fáa landsstýrisløn og løgtingsløn í senn í eitt hálvt ár, so er tað kortini ikki so.
Tað vísir ein kanning í Sosialinum í dag. Blaðið hevur spurt øll tey 33 fólkini, sum sita á tingi, og 26 teirra siga, at tey eru beinleiðis ímóti hesi skipan og vilja hava hana broytta.
Bara tvey teirra, Bill Justinussen úr Miðflokkinum og Rósa Samuelsen úr Sambandsflokkinum, halda tað vera í lagi, at ein persónur, sum hevur sitið í landsstýrinum og aftur tekur sæti á tingi, bæði fær tær 50.000 krónurnar í landsstýrisløn og tær 38.000 krónur í tingmannaløn samstundis í seks mánaðir.
Málið verður tikið upp í løgtinginum í dag. Rigmor Dam úr Javnaðarflokkinum og Kristina Háfoss úr Tjóðveldi hava sett løgmanni munnligan fyrispurning um málið. Tingfundurin í dag byrjar klokkan 11, og einasta mál á skránni eru munnligir fyrispurningar.
Sosialurin, sum verður borin í hvørt hús í dag, kann eisini lesast við at TRÝSTA HER
