- Nú skal tað verða, at tey menningartarnaðu fáa sína egnu rødd.
Tað sigur Sigrun Wardum, forkvinna í felagnum Javni.
Nevndin hevur fyrireikað eina viðtøkubroyting, so vald verður undirnevdin Spyr meg, sum skal hava formann og tveir nevndarlimir. Javni velur eitt fólk at luttaka á nevndarfundunum í Spyr meg at hjálpa teimum við at skipa fundin og skriva. Forkvinnan í Javna hevur rætt til at møta á nevndarfundunum í Spyr meg, eins og formaðurin ella forkvinnan í Spyr meg fær rætt til at møta á fundum hjá starvsnevndini, men uttan atkvøðurætt.
Tað er við støði í Independent Living hugtakinum, at hetta stigið verður tikið. Tað er eitt rák, sum hevur íblástur í tiltikna rasustríðnum í Amerika í sekstiárunum. Rasustríðið bleiv skjótt ført yvir á aðrar minnilutabólkar so sum fólk við virkistarni av ymiskum slagi. Meginhugtøkini eru frælsi at velja, sjálvræði og tign.
Tey menningartarnaðu fólkini skulu hava ein pall, har tey sjálvi sleppa at greiða frá sínum ynskjum og áhugamálum.
Sigrun Wardum dugir ikki at hugsa sær til, at tá ið málið kemur fyri á aðalfundinum leygardagin, at nakar fer at atkvøða ímóti.
Tíggju ella ellivu fólk við menningartarni stilla upp til nevndarvalið. Formaðurin verður valdur beinleiðis á aðalfundinum.
Tað hevur verið eitt stórt arbeiði at fyrireika Spyr meg. Tvey skeið hava verið hildin fyri menningartarnaðum fólkum, tað fyrra umborð á Norrønu í fjør og tað seinna á Føroya Fólkaháskúla herfyri. Tey vórðu har skúlað til at kenna síni rættindi og at kunna arbeiða í nevnd.
Onkuntíð stinga seg væntandi upp mál, har andsøgn er millum hugsanina hjá Javna og Spyr meg. Tað kann eisini hugsast, at nevndin ikki verður samd.
Sigrun Wardum sigur, at nevndin mangan hevur ásannað, at tørvur er á einum slíkum felag.
- Tá ið vit hava verið í samband við myndugleikar um okkurt viðvíkjandi teimum menningartarnaðu, eru vit spurd, hvat tey menningartarnaðu sjálv halda, hava vit einki havt at svarað, í tey vórðu ikki spurd.
Tað er ikki minst viðvíkjandi bústaðarmøguleikum, at tey menningartarnaðu hava ymiskar meiningar. Summi vilja búgva fyri seg sjálv, og onnur vilja heldur búgva saman við øðrum.
- Vit eru ógvuliga spent, hvussu hetta fer at eydnast, og vit hava eisini roynt at fáa fleiri fólk við menningartarni at koma á aðalfundin, sigur Sigrun Wardum.
