Dagurin 4. mars 2008 kann fáa sera stóran týdning fyri politiska lívið hjá Hillary Clinton. Tann dagin hava demokratarnir uppstillingarval í teimum báðum stóru statunum Texas og Ohio, og aftan á tíggju ósigrar á rað hevur Hillary brúk fyri at vinna teir báðar. Tað siga eygleiðararnir, og tað sigur maður hennara eisini.
-Vinnur hon í Texas og í Ohio, vænti eg, at hon verður forsetavalevni hjá demokratunum í heyst. Vinnur hon ikki, so vænti eg ikki, at hon klárar tað. Avgerðin er tykkara, segði Bill Clinton, tá hann í gjárkvøldið hjálpti konuni á veljarafundi í Beaumont í Terxas.
Umframt Texas og Ohio hevur Rhode Island eisini uppstillingarval tann 4. mars. Men tað er uttan iva úrslitið í Texas, sum fær tann størsta týdningin, tí staturin hevur ikki færri enn 228 valmenn á tí endaliga uppstillingarfundinum hjá demokratunum.
Tær seinastu meiningakanningarnar vísa, at Hillary Clinton er eitt vet framman fyri Barrack Obama í Texas, men eygleiðarar vísa á, at henni tørvar greiðar sigrar í teimum statunum, sum eftir eru, um hon skal tryggja sær fleiri valmenn enn Obama. Sambært útrokningum hjá AP-tíðindastovuni skal Hillary Clinton vinna 57 prosent av teimum valmonnunum, sum eftir eru at stríðast um.
Í løtuni hevur Barrack Obama 1.178 valmenn í sínum parti, meðan Hillary Clinton hevur 1.024. Enn eru 1.025 valmenn eftir at dystast um, og 334 teirra eru úr Texas og Ohio.
