Besta liðið hjá Team Klaksvík er, sum vant, á aftasta plássi í FTZ-kappingini hjá monnum. Onki óvanligt er í hesum, tí at síðani felagið fór at taka lut í bestu mansdeildini í hondbólti hevur felagið endað á aftasta plássi hvørt einasta ár - undantikið í 2012, tá ið heldur nýggja klaksvíksfelagið endaði á fimta plássi. Eftir seks umfør í ársins landskapping hevur Team Klaksvík tapt hvønn einasta dyst.
Í kvøld skrivar lokalmiðilin úr norðuroyggjum, Norðlýsið, at Svein Rógvi Nielsen er farin frá sum venjari hjá Team Klaksvík. Hetta er nakað, ið nevndin í felagnum og Svein Rógvi sjálvur hava avgjørt í sátt og semju. Sambært Norðlýsinum, so heldur Svein Rógvi sjálvur, at tíðin er komin til, at nýggjur maður skal yvirtaka besta mansliðið, so liðið kann gerast enn betur, enn tað er nú. Svein Rógvi Nielsen hevur staðið á odda fyri Team Klaksvík síðani á sumri 2013. Tó steðgar virksemi hansara í Team Klaksvík ikki nú, tí at hann fer framvegis at virka í felagnum á annan hátt.
Næsti dystur hjá Team Klaksvík er mikukvøldið, tá ið klaksvíkingarnir fara til Vestmanna í tráðanini eftir fyrstu stigunum. So er spurningurin, um nýggjur venjari er settur til liðið til ta tíð.
