Útbygging
Seinastu tíðina hevur verið rættiligt rok heimanfyri Landsjúkrahúsið. Hetta rok kemst av útbygging av Landsjúkrahúsinum, og heldur hon helst fram heilt til juni í 2003.
Sjúkrahúsleiðarin, Jóanis Erik Køtlum, hevur verið formaður í bygginevndini, men nú tá hann hevur sagt seg úr starvi, hevur Kristian Rasmussen, verkfrøðingur, tikið yvir fyribils.
? Arbeiðið er komið rættiliga langt, sigur Kristian Rasmussen.
? Ætlanin er, at øll innilokingin, tað vil siga betongarbeiðið, skal verða liðugt til apríl komandi ár, og tað sær út til at halda. Í løtuni verður arbeitt við fjórðu hædd, sum er næstseinasta hæddin.
Fimm ymiskar fyritøkur eru við í arbeiðinum. Innilokingini tekur danska felagið Pil & Søn sær av, umframt øllum timburarbeiðinum. Eitt annað danskt felag, Glenco Vsk., tekur sær av ventilatión, hita, saniteti og tí, sum hartil hoyrir. El-arbeiðið hevur KB El-teknik undir hond, málarameistari er Henning Sørensen og gólváleggjari er Eyðfinn Eyðunsson.
Niðasta hæddin skal hava laboratorium og nakað av tøknini. Á aðru hædd verður skaðastovan, intensiv deild, viðrakning, móttøka og forhøll. Triðja hæddin verður ein skurðdeild. Medisinska deild skal halda til á fjórðu hædd, og á fimtu og seinastu hæddini, verður ein nýtmótans seingjadeild.
Hetta er ein seingjadeild, ið uppfyllir øll krøv, sum verða sett til eina tílíka deild í dag. Har fara til dømis at vera tvey-songsstoovur við egnum bað og WC.
Sambært Kristian Rasmussen hevur Landssjúkrahúsið slíkar stovur sum er, men tær eru als ikki í somu dygd, sum tær, ið bygdar verða nú.
