Allir dystirnir í øllum deildum í fimta umfari vórðu telvaðir í stórum felagsumfari í Vestmanna í gjár.
Komið er nú hálva leið í landskappingini í talvi.
Havnarmenn vóru eitt stig fremri fyri innanhýsis dystin í gjár, og tann støðan broyttist ikki, tí dysturin endaði javnur.
Tað endaði javnt á fremsta og aftasta borði, og á miðborðunum fingu liðini hvør sín sigur. Eitt sindur óvæntað vann Havnin á øðrum borði og Sandavágur á triðja borði - hitt øvugta var kanska heldur væntandi.
Høgni grundaði djúpt og leingi um heldur spentu og kompleksu støðuna, sum kom upp á borðinum, og endin var, at tíðin gekk undan hjá honum í ógreiðari støðu. Carl Eli fekk her søta hevnd fyri snópisliga tapið fyri Høgna í FM-einstaklingakappingini á páskum í fjør, tá ið hann tapti í sera góðari støðu.
Silas kláraði at fáa vinnandi fyrimun í at síggja til javnari endastøðu. Ein kærkomin uppreisn hjá Silasi, sum mest hevur telvað á B-liði felagsins í vetur.
Rógvi Egilstoft fekk - sum so ofta fyrr - remis móti stórmeistaranum. Helgi og Rógvi telvaðu eitt fínt talv. Helgi offraði býtismun í miðtalvinum, leingi var líkt til, at tað fór at geva honum avgerandi fyrimun, men eftir drúgt og spennandi talv, endaði stríðið við javnleiki.
Sama var á fjórða borði. Sjúrður og Jón telvaðu eisini báðir væl, men har stóð fast allan vegin, tó at nógvar snildir vórðu royndar at skaka javnvágina.
5. umfar, 5. januar 2024
Havnin - Sandavágur 2 - 2
Helgi Dam Ziska - Rógvi Egilstoft ½ - ½
Carl Eli N. Samuelsen - Høgni Egilstoft Nielsen 1 - 0
Luitjen Akselsson Apol - Silas Eyðsteinsson 0 - 1
Sjúrður Thorsteinsson - Jón í Horni Nielsen ½ - ½
Hinir dystirnir
Havnin 2 - Klaksvík 1 ½ - 3½
Klaksvík 2 - Sandavágur 2 2 - 2
Støðan í 1. deild (eftir 5 umfør):
1. Havnin 16½ stig
2. Sandavágur 15½
3. Klaksvík 11
4. Sandavágur B 8
5. Havnin B 5
6. Klaksvík B 4
Hinar deildirnar
Telvað var í øllum deildum í gjár. Í aðru.- og triðju deild eru liðini seks, í fjórðu deild eru tey tíggju, og í unglingadeildini níggju.
Støðan í 2. deild
1. Kollafjørður 13½
2. Kongshavn (Runavík) 10½
3. Klaksvík 9½
Støðan í 3. deild
1. Toftir 14½
2. Sandavágur 13½
3. Rókur 10 ½
Støðan í 4. deild
1. Havnin 17
2. Klaksvík 15
3. Klaksvík 13
Unglingar
1.-3:
Klaksvík 9
Gøta 9
Havnin 9
Meira kann lesast um kappingina á heimasíðu Talvsambandsins: faroechess.com.
Telvað verður aftur í landskappingini um tvær vikur. Tá koma dystirnir í sætta umfari fyri.
