Fyrireikararnir lýsa tiltakið sum nakað nýtt og serligt á ólavsøkuróðrinum. Ein stuttlig krúlla ella fólkslig finala, ið verður beint aftaná tíggjumannafarsróðurin.
Í Ódnartaki starta bátarnir við reyvini heilt inn ímóti bryggjuni, beint undir stóru mannamúgvuni, og spreingja so útfrá í einum ordiligum mannfólkastarti. Tað gongur skjótt fyri seg, og áskoðararnir uppliva rokið og spenningin frá fyrstu røð, og síggja pulsin banka í æðrunum á monnum. Bátarnir rógva einans góðar 100 metrar, og alt kann henda.
Í fjør vóru tað vestmenningar, ið vunnu. Verða tað nólsoyingar í ár? Fara klaksvíkingar at vísa, hvar Dávur keypti ølið? Gera argjamenn bart? Skulu vit síggja ræðandi styrkina hjá havnarmonnum? Ella møguliga verður tað onkur heilt annar, ið megnar at renna avstað við sigrinum.
