Tað hevur verið móttøka í VB húsinum í kvøld. Spælarar og viðhaldsfólk hava fegnast um, at kvinnuliðið hevur vunnið næstbestu deildina og um, at mansliðið við 3-1 sigri á heimavølli ímóti teimum næstbestu hjá NSÍ tryggjaði sær silvurkrónurnar og harvið pláss í bestu deildini í 2015.
Julius Vest Joensen er formaður í FC Suðuroy. Hann og hini í felagnum hava størsta partin av árinum vónað, at tað fór at eydnast:
-Tá ið vit spældu javnt í Klaksvík, og 07Vestur spældi javnt í Trongisvági kendist møguleikin lítil. Men so vunnu vit stórt síðsta vikuskifti í Gundadali ímóti B36 samstundis sum 07Vestur tapti á heimavølli ímóti KÍ, og so var tað aftur í okkara hondum at avgera. Spælararnir vóru kanska tyngdir av nervum fyrra hálvleik, men eftir steðgin var eingin ivi, og sigurin var uppiborin, sigur FC Suðuroy formaðurin.
Tá ið hann fær spurningin, hvussu tað verður næsta ár, svarar hann soleiðis:
-Vit vóna, at venjararnir halda fram Tað er eisini ynski hjá spælarunum. Og vit vóna eisini, at spælararnir fara at halda fram í felagnum. Nú fegnast vit um uppflytingina í vikuskiftinum. Vit hava tosað við venjararnar, og tað liggur í kortunum, at vit halda fram við samstarvinum, sigur Julius Vest Joensen.
Síðani summarsteðgin hava Jón Pauli Olsen, Bogi Mortensen og Palli Augustinussen havt ábyrgdina av FC Suðuroy liðnum, sum í dag flutti upp í bestu deildina.
27. umfar
KÍ-HB 4-2 (2-1)
Víkingur-B36 2-0 (1-0)
EB/Streymur-07Vestur 1-6 (0-3)
AB-TB 0-0
FC Suðuroy-NSÍ 3-1 (1-1)
Endaliga støðan
TB 67
FC Suðuroy 48
07Vestur 47
B36 36
AB 35
NSÍ 34
Víkingur 34
KÍ 29
HB 29
EB/Streymur 17
