Johannes Jensen, stjóri á Hotel Føroyum, er fáorðaður, tá hann verður spurdur um orsøkina til, at Leif Sørensen, ið var matstovuleiðari, er givin á KOKS.
- Tað er persónligt og skal vera privat, sigur Johannes Jensen. Sostatt ber til at staðfesta, at tað ikki eru fakligar og professionellar ósemjur, sum liggja aftanfyri ósemjuna millum Leif Sørensen og Johannes Jensen.
Les eisini Leif Sørensen givin á KOKS
Stjórin á Hotel Føroyum heldur annars, at samstarvið millum Hotel Føroyar og Leif hevur verið gott.
- Vit hava arbeitt væl saman við Leif og bygt KOKS upp til tað, sum tað er í dag. Vit hava samstarvað í fýra og eitt hálvt ár um hetta, og tað hevur verið eitt gott samstarv. Men vit skulu víðari við KOKS nú við nýggjum kreftum, men eg vil fegin takka Leif fyri tað samstarvið, sum vit hava havt, sigur Johannes Jensen.
- Tað er sjálvandi ein missur. Vit hava verið við at skapt brandið KOKS og brandið Leif Sørensen, men løtan er tann rætta at koma víðari, heldur Johannes Jensen.
Leif Sørensen visti í gjár at siga, at ein avloysari var klárur fyri hann á KOKS, men at hann ikki visti, hvør viðkomandi var. Hetta vísir Johannes Jensen partvíst aftur.
- Tað arbeiðið er ikki liðugt enn, men vit eru í gongd við tað og skulu nokk fortelja tað, tá alt er komið upp á pláss, sigur Johannes Jensen, sum ikki vil gera viðmerkingar til, um tað verður ein, sum frammanundan er knýttur at KOKS, ið tekur yvir eftir Leif Sørensen.
Hoyr samrøðu við Johannes Jensen við at trýsta á pílin undir myndini.
