Tað gloymda kríggið í Gaza

Í hesum døgum tosa altjóða fjølmiðlarnir bara um kríggið í Libanon, og tí frættist einki frá krígnum í Gaza. Men tað heldur fram

Bardagarnir í Gaza halda fram í skugganum av kríg­num í Libanon, og tann seinasta mánaðin hava 169 palestinar latið lív í ísraelskum álopum. Bara ein ísraelskur hermaður er fallin, og hann doyði, tá ísraelskir hermenn skutu hann av misgáum.
Síðani víðgongdir pale­stinar burturfluttu ein ísraelskan hermann tann 25. juni, hevur ísraelska hermegin søkt av nógvum málum í Gaza-geiranum. Ísrael sigur, at herurin og flogvápnið hava fingið boð um at oyðileggja samskiftis- og samferðslukervið hjá yvirgangsmonnunum. So seint sum mána­dagin bumbaðu ísraelsk flogfør mál í Gaza. Palestinar hava svarað álopunum við at senda 71 heimagjørdar rakettir inn í Ísrael. Í sama tíðarskeiði hava ísraelsmenn skotið 1.050 granatir inn í Gaza-geiran, skrivar AP.
Í gjár royndi ein norsk semingsnevnd at sleppa inn í Gaza-geiran, men mátti venda aftur, tí Ísrael hevði stongt marknaliðini. Útlendskir eygleiðarar hava smáar vónir um frið í Gaza, eftir at ísraelski herurin hevur tikið formannin í palestinska tjóðartinginum við teirri grundgeving, at hann er limur í Hamas. Tann seinasta mánaðin hava ísraelsmenn tikið 64 Hamas-leiðarar.
Ísraelsku álopini á Gaza hava fingið fólk at venda sær ímóti Ísrael. Í januar vísti ein meiningakanning, at bara 25 prosent av palestinunum í Gaza tóku undir við ætlanini hjá Hamas at strika Ísrael av heimskortinum. Nú vísir ein tilsvarandi kanning, at 55 prosent styðja Hamas. Tann sama kanningin vís­ir, at 97 prosent av pale­stinunum styðja Hizbollah í bardaganum við Ísrael.