Í morgin byrjar Frigg festivalurin í Keypmannahavn av álvara, og longu nú merkist huglagið í danska høvuðsstaðnum, eittnú í Føroyahúsinum, har fyrireikingar fara fram.
Nakrir, sum gleða seg, eru menninir í bólkinum Swangah, tí teir hava fyrireikað seg sera væl til nýggja festivalin.
- Vit hava lagt dent á, at konsertin á Frigg verður øðrvísi, enn nakað vit fyrr hava gjørt. Vit vilja fegnir geva fjøldini eina feita uppliving til hvørja einastu konsert vit spæla, siga mennirnir í Swangah.
Og talan verður um kenst tilfar, men umframt verður eisini nógv nýtt og spennandi at hoyra frá Swangah, tí bólkurin hevur júst arbeitt við nýggjum tilfari í upptøkuhølunum.
- Vit arbeiða í løtuni saman við einum produsara úr Rumenia, sum vit arbeiða øgiliga tætt saman við, og vit hava longu fleiri projekt í gongd. Vit hava kort síðani verði í studio í Keypmannahavn, har vit hava gjørt upptøkur til nøkur nýggj løg, sum eftir ætlan skulu útgevast komandi tíðina, siga mennirnir í Swangah.
Okkurt óvæntað
Tískil er væntandi, at Swangah er til dystin fús, nú Friggpallurin er opin fyri teimum.
- Vit ætla at koyra fulla skrúvu til Frigg. Vit eru síðsti bólkur fríggjakvøldið, og tað vilja vit at fjøldin skal merkja. Vit koma at spæla fleiri av okkara gomlum løgum, men eisini nýggj løg. Umframt tað, hava vit fyrireikað eitt stórt show við nøkrum ”spennandi yvirreiskilsum”, sum teir í Swangah taka til.
Og teir í Swangah hava eisini í huga, at Frigg er ein møguleiki at vísa útheiminum, hvat teir duga.
- Tað hevur uttan iva stóran týdning, at ein festivalur sum Frigg sær dagsins ljós. Fyri okkum í Swangah merkir tað, at vit fáa møguleikan at flyta okkum víðari út í tónleikaheimin, og vónandi lata nýggjar hurðar seg upp fyri okkum. Hetta vil verða galdandi fyri einhvønn bólk ella einstakling, sum spælur á Frigg festivalinum. Stutt sagt; eitt genialt initiativ. Vit gleða okkum!, siga mennirnir í Swangah, sum í løtuni fyrireika seg væl til Frigg.
