Teir 182 svimjararnir umboðaðu sjey ymisk svimjifeløg, sum komu úr øllum landinum.
Skeggjar fekk flest heiðursmerki
Lagt varð til brots fríggjakvøldið, tá elstu luttakararnir royndu seg í teimum fýra svimjigreinunum, sum vanliga verður kappast í.
Leygarmorgunin fóru yngru luttakararnir í gongd, og síðani varð hildið fram, til allar kappingargreinarnar vóru avgreiddar.
Til samans var talan um 34 ymsar kappingargreinar, og tá avtornaði vórðu tað gøtufólkini, sum sótu eftir við flestu heiðursmerkjum.
Annars frætta vit frá fyrireikarunum, at kappingin var sera væl eydna. Nógvir áskoðarar vóru til staðar, tá kappast varð, og einki er at ivast í, at luttakararnir eisini stuttleikaðu sær, nú tey vóru savnað so at siga eitt heilt vikuskifti.
Sum omanfyrinevnt, so vórðu tað Skeggjar úr Gøtu, sum fingu flestu heiðursmerkini, men tað var nú ikki soleiðis, at gøtufólkini tóku alt til sín.
Øll feløgini fingu onkur merki við sær heim aftur, og varð samlaða býti soleiðis:
Skeggjar, 10 gull, 8 silvur og 7 bronsu
Havnar Svimjifelag, 10. gull, 7 silvur og 4 bronsu
Tvøroyrar Svimjifelag, 7 gull, 10 silvur og 6 bronsu
Ægir, 2 gull, 1 silvur og 6 bronsu
Flot, 2 gull og 4 bronsu
Fuglafjarðar Svimjifelag, 1 gull og 1 silvur
Vágs Svimjifelag, 3 silvur og 2 bronsu
