SUPERLIGAN
Tað er lagt upp til spenning í superliguni. Í vetrarsteðginum var Brøndby so nógv frammanfyri hini á støðutalvuni, at eingin roknaði við møguleikanum, at tað skuldi gerast spennandi. Men í trimum teimum fyrstu umførunum eftir vetrarsteðgin hevur Brøndby fingið tvey stig, og FCK hevur fingið fulla úrtøku ella níggju stig.
Hesa ferð spældi Brøndby væl á heimavølli, men teir taptu 1-0 ímóti FCM, sum er næstfremst og átta stig aftanfyri Brøndby. Nýggi svenski FCM málverjin, Ola Tidman, var ógvuliga stinnur.
FCK var í Odense, og har var tað sum í ævintýrinum hjá 200 ára gamla H. C. Andersen, sum var ættaður úr Odense og sum búði í Keypmannahavn. Tað sá illa út hjá FCK. OB spældi betri, og í 1. hálvleiki løgdu teir seg framum. Álopsspælararnir hjá FCK, Álvaro og Zuma, vóru lítið eyðsýndir, og teir megnaðu ikki at fáa mál, men tað hjálpti væl upp á spælið, tá ið Jesper Bech varð settur á miðvøllin í vinstru fyri Magne Hoseth, sum heldur ikki var serliga eyðsýndur.
Miðskeiðis í 2. hálvleiki javnaði miðvallarin Michael Silberbauer, og í yvirtíðini var hann aftur upp á spæl og stútaði frísparksinnlegg úr vinstru í málið, og so hevði FCK vunnið 2-1.
Sunnudagin fær FCK í Parkini vitjan av Brøndby, og tað verður roknað við, at allir sessirnir í Parkini fara at vera upptiknir.
Viborg vann 2-1 á heimavølli ímóti AaB. Harvið er Viborg á fjórða plássinum trý stig frammanfyri OB á fimta plássinum. Fjórða plássið telur nógv, tí tað ber atgongd til Royalu liguna við sær, og tað seta teir í Danmark ikki so lítlan prís uppá.
Í botnstríðnum lætti Randers sær av aftasta plássinum, tá ið teir á heimavølli vunnu 1-0 ímóti ikki serliga gramma AGF. Herfølge er aftast, eftir at teir í Farum vóru annar parturin av málleysum javnleiki. FCN er omanfyri strikuna, men teir hava sama stigatal sum Randers.
Silkeborg var í niðurflytingar vanda í vetrarsteðginum. Nú sær væl ljósari út. Sunnudagin vann SIF 2-1 á heimavølli ímóti Esbjerg, og nú er frástøðan til strikuna sjey stig. Esbjerg er langt frá bronsuplássinum, sum teir vunnu fyri einum stórum ári síðani.
