Strandferðsla
Skipini hjá Strandferðsluni skulu sigla meiri komandi ár.
Tað ætlar samgongan.
Í hesum sambandi hevur samgongan sett 8,4 milliónir av, sum eru markaðar til meiri sigling til Suðuroyar, Nólsoyar og Kalsoyar.
Hetta er ein liður í at knýta útjaðaranin tættari upp í miðstaðarøkið, sigur Jacob Vestergaard, landsstýrismaður í innlendismálum.
- Nú Norðoyatunnilin er latin upp, er nógv størsti parturin av fólkinum knýttur upp í
miðstaðarøkið, og tí er tað umráðandi eisini at geva hinum borgarunum í landinum
javnbjóðis møguleikar í tann mun, tað kann lata seg gera.
Hann sigur í hesum sambandi, at næsta ár ferð Smyril at sigla tríggjar túrar afturat um vikuna ímillum Suðuroynna og Havnina.
- Hesir túrarnir verða í ein ávísan mun lagdir í vikuskiftinum, tá ið mest fólk siglur.
Men hann leggur afturat, at tað er ikki vist, at játtanin røkkur til at Smyril siglur tríggjar túrar afturat um vikuna alt árið.
- Tí verður játtanin lagað soleiðis, at Smyril ikki fer undir hesar tríggjar eykatúrarnar fyrrenn út á árið, so at hann kann halda fram við trimum túrum afturat um vikuna uttan slit í alt 2008.
Annars sigur landsstýrið, at Smyril kostar umleið 11,7 milliónir krómur meiri at reka, enn mett var.
- Høvuðsorsøkirnar til hesa stóru hækking eru bæði tað, at oljan er dýrkað nógv og at hann brúkar meiri olju enn mett. Somuleiðis hevur hann kravt størri manning enn roknað varð við.
Tað hevur leingi verið eitt ynski úr Nólsoy og úr Kalsoy, at tey fáa fleiri túrar afturat um kvøldarnar og um vikuskiftini.
Og tað verður næsta ár, at hetta ynski verður uppfylt. Í hesum sambandi er ætlanin, at skipini hjá Strandferðsluni skulu sigla fleiri túrar afturat um kvøldið til Nólsoyar og Kalsoyar. Nólsoyingar 15 túrar afturat um vikuna og Kalsoyingar fáa eisini fleiri túrar afturat, men akkurát hvussu nógvar, eydnaðist ikki at fáa upplýst.
Annrs verður víst á, at stór óvissa er altíð um oljuprísirnar og tí er altíð ein ávísur váði við fíggjarlógini. Í fíggjarlógini er ikki lagt upp fyri møguligum hækkingum, men hækkar prísurin á tung- og gassolju 1 krónu fyri liturin, kann gerast talan um eina eykaútreiðslur upp á 10 millónir krónur
