Fíggjarlóg
Tvær havnir fáa pening til nýgerð komandi ár, og fýra vegastrekki fáa játtan. Helvtin av játtanini til vegagerð fer til Gásadalstunnilin. Samferðsluhavnirnar á Drelnesi og Syðradali á Kallsoy fáa 39 milliónir.
Íløgurnar til nýgerð av landsvegum minka við umleið 30 miliónum í mun til verandi fíggjarlóg. Tilsamans seks milliónir krónur eru settar av til nýgerð í uppskotinum, sum Karsten Hansen, landsstýrismaður við fíggjarmálum legði fram í gjár.
Av teimum seks milliónunum er helvtin, tríggjar milliónir settar av til vega- og tunnilssambandið til Gásadals. Ein millión í part er sett til tey trý økini Skálafjørð - Strendur, Gomlurætt - Tórshavn og nýggja innkoyring til Tórshavnar.
Nýggja samferðsluhavnin á Syðradali fær eftir uppskotinum 14 milliónir, meðan 25 milliónir skulu brúkast til samferðsluhavnina á Drelnesi.
Til bygging av nýggja Smyrli eru settar 107 milliónir av, og tað er so tað, Strandferðslan kann vænta sær komandi ár.
Einki oyra er sett av á fíggjarlógaruppskotinum til tunnilstrygd, so sum trygging av loftum, ljós og annað, sum skal gerast.
Heldur einki er sett av til undirsjóvartunnil undir Leirvíksfirði, og einki er sett av til vegagerð í Suðuroy.
Vágs Havn er ikki nevnd í fíggjalógaruppskotinum fyri 2003, og eingin játtan yvirhøvur er til studning til havnir.
