Sambært Aksel V. Johannesen, so valdu teir tríggir flokkarnir at taka tey tungu og stóru málini fyrst í samráðingunum, og tí steðgaðu samráðingarnar so tíðliga.
Ósemja var um at lækka ríkisveitingina. Sum skilst ætlaði Framsókn, at hon skuldi lækka eftir ávísum leisti. Ruth Vang hevur í valstríðnum nevnt 25 milliónir krónur um árið.
Hetta var í øllum førum knúturin, sum ikki kundi loysast.
Javnaðarflokkurin fer nú at taka støðu til, hvussu víðari skal farast fram við samráðingunum. Helst verða samráðingar millum Javnaðarflokkin, Tjóðveldi og Framsókn í morgin.
