Nú skal ein stórur barnagarður gerast í Kollafirði.
Tað hevur Tórshavnar Býráð samtykt í kvøld.
Býráðið ásannar, at tað er stórur tørvur á nýggjum dagstovni í Kollafirði í staðin fyri stovnarnar við Botnánna og millum Bóla og dagrøktina.
Býráðið samtykti herfyri at seta fimm milliónir av á fíggjarætlanini fyri næsta ár til nýggjan dagstovn í Kollafirði.
Býráðið metir, at í nýggja barnagarðinum skal minst vera pláss fyri 90 børnum fyri at nøkta allan tørvin, men áðrenn endalig støða verður tikin, skal tørvurin útgreinast.
Barnagarðurin verður mitt í bygdini, niðanfyri Botnaveg, áleið har, skúlin er. Stykkið er 5.111 fermetrar og samráðingar hava verið við eigaran um prísin fyri stykkið.
Á býráðsfundi í kvøld varð samtykt at játta 1,5 milliónir til at keypa grundstykkið fyri. Peningurin skal eisini brúkar til at fyrireika byggingina fyri og útvega byggiskrá. Myndina tók Erik Christensen
|
