Hóast tað mest vóru smáting, sum løgreglan fekk fráboðanir um í illveðrinum í gjárkvøldið og síðstu nátt, vísir henda myndin, at tað kortini eru veldugar náttúrukreftir, sum eru upp á spæl, tá slíkt illveður herjar um landið.
Myndin er av stóra bussinum hjá Bygdaleiðum, sum koppaði í harðari hvirlu á Krambatanga á Tvøroyri. Her stóðst tíbetur eingin mansskaði, men nakað av skaða hevur bussurin so fingið.
Tað var síðstu nátt klokkan 01.41, at løgreglan fekk fráboðan úr Suðuroy um, at hesin bussurin var koppaður, og nakrar minuttir seinni - ella klokkan 02.06 - vóru boðini, at trolbáturin Birtingur hevði slitið í Leirvík.
