Loksins aftaná átta umfør í bestu írsku fótbóltsdeildini brast tað fyri nev hjá Stefani Radosavljevic.
Stefan tryggjaði liði sínum, Sligo Rovers sigurin á útivølli móti Dundalk við sigursmálinum hann skoraði, tá ein minuttur var eftir av vanligu leiktíðini.
Talan er um fyrsta málið hjá Stefani í bestu írsku deildini.
Sligo Rovers vann dystin 2-1. Stefan kom á vøllin tá 68 minuttir vóru leiktir.
Max Mata legði Sligo Rovers á odda 1-0 tá eitt korter var farið av fyrra hálvleiki. Beint undan steðginum javnaði Dundalk til 1-1.
Sigurin merkir, at Sligo Rovers nú er triðfremst í deildini við 12 stigum. Seks stig eru upp til oddaliðið, Bohemians sum er fremst í deildini við 18 stigum.
In.fo fer at vísa hæddarpunktini frá dystinum, og harvið eisini málið hjá Stefani seinni í kvøld.
