Stefan hevur møguleika at seta met

Klokkan 14 í dag fer U-21 landsliðið fyri fyrstu ferð at spæla í Klaksvík. Higartil hevur liðið spælt á Svangaskarði og á Tórsvølli.

U-21 landsliðið hevur verið við í undankappingum síðani 2007. Liðið hevur spælt 70 dystir, og tilsaman hava 180 spælarar umboðað Føroyar á U-21 landsliðnum. 30 spælarar hava spælt 10 ella fleiri ferðir á liðnum. Metið er 18 dystir. Tveir klaksvíkingar hava verið 18 ferðir á U-21 landsliðnum – Kristoffur Jakobsen og Jóannes Bjartalíð. At Kristoffur stendur ovari í yvirlitinum enn Jóannes kemst av, at Kristoffur spældi fleiri minuttir enn liðfelagin í KÍ.

Av teimum spælarunum, sum nú eru á liðnum, eigur Stefan Radosavljevic flestar landsdystir. HB spælarin er liðformaður á liðnum, og hann hevur higartil spælt 13 U-21 landsdystir. Tað eru sjey dystir eftir at spæla hjá Føroyum í hesi EM undankappingini. Um Stefan verður við í seks ella sjey dystum, so fer hann at seta nýtt met. Stefan er ein av trimum toppskjúttum á U-21 landsliðnum. Hann hevur saman við Meinhardi E. Olsen og Gunnari Zachariassen, sála, skorað fýra mál, og Stefan verður einsamallur toppskjútti, um hann skorar eitt mál aftrat.

Yvirlitið vísir, at fleiri av teimum, sum hava verið ofta á U-21 landsliðnum, seinni hava spælt nógv á A-landsliðnum. Millum hesar eru Gunnar Nielsen, Hallur Hansson, Gilli Rólantsson Sørensen, René S. Joensen og Pól Jóhannus Justinussen, sum er givin av spæla á hægsta støði. Aðrir, sum fyri stuttum hava vunnið fast pláss á landsliðnum eru Meinhard E. Olsen og Jóannes Bjartalíð.

Yvirlitið vísir eisini, at tað eru spælarar, sum í síni tíð vóru fastir menn á U-21 landsliðnum, men sum ikki vunnu seg á A-landsliðið. Millum hesar eru Kristoffur Jakobsen, Rógvi Holm og Róaldur Jakobsen, sum ikki longur eru í bestu deildini. Kristoffur spældi ein dyst á besta landsliðnum, Rógvi Holm var ikki á landsliðnum, áðrenn hann fór av landinum í útbúgvingarørindum, og Róaldur spældi seks landsdystir, áðrenn hann orsakað av skaða noyddist at gevast at spæla á hægsta støði.

Jákup L. Thomsen í HB er nústaðni komin fyri seg eftir langan skaðasteðg, og Ari Olsen stríðist við at koma fyri seg eftir krossbandsskaða. Millum teir, sum eru á gáttini til besta liðið, eftir at hava vunnið altjóða royndir á U-21 landsliðnum, eru KÍ liðformaðurin Jákup B. Andreasen og Petur Knudsen, sum í summar skifti barndómsfelagið NSÍ út við Lyngby í næstbestu donsku deildini.