Eftir steðg orsaka av steypakappingini síðsta vikuskifti er umfar í landskappingini aftur á skránni. Sjøtil verður settur á fjórða umfar longu í kvøld, tá ið grannarnir í Gundadali bresta saman. Hinir fýra dystirnir eru settir at vera sunnudagin.
Sambært støðutalvuni er talan um innanhýsis uppgerðir millum seks tey ovastu á talvuni og innanhýsis uppgerðir millum tey fýra, sum nú eru á niðastu plássunum.
Tað er lítið fráliðið, og tað eru 24 umfør eftir at spæla. Í fjør vísti AB, at tað ber til orduiliga at fóta sær, hóast tað í nógvum teimum fyrstu umførunum ikki gekk nakað serligt. Men ofta hevur tað víst seg at vera tungt hoyggj at draga, tá ið munurin frá teimum við soltnastu úrtøkuni og fram til tey bestu tíðliga í kappingini verður ov stórur.
At skráin hetta vikuskiftið sær út, sum hon ger, ber við sær, at tað er møguleiki hjá eitt nú AB og serliga Víkingi, sum ikki hevur havt eydnuna við sær, at lyfta seg nærri plássunum, sum hesi feløgini halda, at tey eiga at vera við í kappingini um. Felags fyri AB og Víking er tað, at tey hesa ferð eiga heimavøll ímóti uppflytarunum.
Burtursæð frá B36 og Skála so eru øll hini feløgini í Effo-deildini framvegis við í kappingini um løgmanssteypið. Harvið verður tað næstu vikurnar heilt stutt millum týdningarmikar dystir.
B36 skal hava nýggja verju
Sunnudagin sendi HB grannarnar í B36 úr steypakappingini. HB var frammanfyri 2-0 í 1. hálvleiki, og støðan var 3-0, áðrenn B36 fekk um endan og tvær ferðir minkaði um munin, og síðstu løtuna var tað heilt spennandi.
Undan grannauppgerðini í landskappingini er tað greitt, at tað enn eina ferð verður neyðugt at umskipa B36 verjuna. Eli Falkvar Nielsen, sum sunnudagin var undir liðini á Hørði Askham í miðverjuni, er leikbannaður. Klæmint Matras er skaddur, Karl Martin Danielsen er langtíðarskaddur, og Robert Heðin Brockie, sum í fjør var sjálvskrivað val, er burturstaddur. Tá ið tað stendur so illa til við fólki, hevði verið upplagt at flutt verjukenda miðvallaran Símun Joensen aftur í miðverjuna, har hann viðhvørt hevur vikarierað, men tað ber heldur ikki til, tí Símun noyddist av vøllinum sunnudagin orsaka av knæskaða, og hann verður ikki tøkur í kvøld.
– Vit hava gott mót, og tað kann gott vera, at tað verður ein nýggjur og á hesum støðinum óroyndur maður, sum fær møguleikan, og satt at siga stúra vit ikki fyri hesum, tí nýggi maðurin hevur í 1. deild víst, at vit skulu rokna við honum, sigur liðformaðurin og hjálparvenjarin Jákup á Borg. Hann sipar til 20 ára Anders Eriksen, sum í fyrstu umførunum hevur verið álitið í miðverjuni hjá liðnum í 12. deild, sum eftir fýra umfør hevur fult stigatal og málmunin 18-4.
– Hann flutti í B36 í fjør. Anders er stórur og sterkur, hann hevur góða spælfatan, og hann dugir væl at finna saman við liðfeløgunum. So tí kvíga vit ikki so nógv fyri, sigur Jákup á Borg.
Hvat ber við sær, at tit rokna við, at tað hesa ferð skal ganga øðrvísi, enn tað gjørdi, tá ið tit sunnudagin taptu 3-2 ímóti HB?
– Serliga seinni parturin av 2. hálvleiki. Tá fingu vit rættiliga um endan. Fyrsta stóra tíman vóru vit als ikki so við upp á tað, sum tað er neyðugt at vera, um hugsningur skal vera um at fáa nakað burturúr so góðum liði sum HB. Tí skulu vit taka útgangsstøði í tí, sum vit vístu síðstu løtuna sunnudagin. Og um nakað skal spyrjast burturúr, so er alneyðugt, at vit sleppa undan persónligu mistøkunum, ið kostaðu so nógv ímóti HB.
HB venjarin Heðin Askham fegnast um, at tað eydnaðist at vinna steypadystin:
– Tað var málið, og at tað eydnaðist ber boð um, at úrtøkan ímóti B36 var betri, enn hon oftast hevur verið tey seinnu árini. Sjálvandi ætla teir sær at byggja upp á avrikið síðstu løtuna. Tá ið vit síggja hetta frá okkara síðu, so mugu vit staðfesta, at nógvir av okkara síðstu tíggju minuttirnar, tá ið teir pressaðu, mistu høvdið. Tað vóru fyrst og fremst royndu menninir – Heini Vatnsdal, Fróði Benjaminsen og Andrew av Fløtum – ið lyftu liðið fram ímóti sigrinum. Teir hava verið framúr higartil í ár. Nú ræður um at fáa skil aftur á spælið í borðunum. Serliga síðstu løtuna vóru vit ikki sannførandi í tí partinum. Um tað fæst at rigga aftur, so hava vit gott mót.
Sunnudagin var tað steypadystur, og í kvøld verður tað landskappingardystur. Er tað stórur munur á avbjóðingunum?
– Í steypakappingini ræður um at vinna hvørja ferð. Tað gerst tú ikki í landskappingini. Vit fara eftir sigrinum, men tað er greitt, at fyritreytirnar eru øðrvísi, enn tær vóru sunnudagin, sigur HB venjarin.
Skulu finna seg sjálvar
Uppflytararnir av Skála bíða framvegis eftir fyrsta stiginum. Nú skulu teir royna seg á Argjum. AB legði bragdliga fyri, men eftir 2- 0 sigurin í Serpigerði hevur talan ikki verið um úrtøku á heimavølli ímóti B36 (1-2) og á útivølli ímóti NSÍ (3-0). Í steypasigrinum ímóti TB síðsta vikuskifti var tað neyðugt við brotssparkskapping, áðrenn AB hevði kvalifiserað seg til næsta umfarið. Bill Jacobsen segði í síni eftirmeting, at síðstu løtuna vóru hansara spælarar illa sperdir.
Og hetta er tað, sum hann vónar verður betri ímóti Skála:
– Skálamenn eru illa sperdir, og talan verður ivaleyst um tætta og torføra avbjóðing. Um vit ætla okkum longri upp at kappast, so er hetta ein avbjóðing, sum vit mugu fáa fulla úrtøku burturúr.
Hvat gera tit fyri at fáa meiri støðugt avrik?
– Hetta er lyklaspurningurin. Í løtum hava vit higartil spælt væl, og aðrar løtur hava vit púra mist takið. Tað er stórur saknur í Morten Overgaard, miðverjanum, sum seinnu árini hevur verið undangongumaðurin. Tíverri vita vit ikki enn, nær hann verður tøkur aftur. Nógvir spælarar eru ungir, og vit hava nógv nýtt fólk. Eftir at vit vunnu 2-0 í Gøtu, eru tað ivaleyst fleiri, sum rokna meiri við okkum. Tað er neyðugt at vera eyðmjúkur í uppgávuni og at arbeiða nógv og hart. Eg ivist ikki í, at evnini eru á liðnum, og at tey fara at koma meiri støðugt til sjóndar, sigur Bill Jacobsen venjari hjá AB.
Eliesar Olsen er framvegis venjari á Skála. Úrtøkan eftir trý umfør er 1-10 og 0 stig:
– Ein stórur partur av frágreiðingini er, at spælararnir eru so óroyndir. Pætur Dam Jacobsen hevur spælt umleið eins nógv í bestu deildini sum allir hinir tilsaman. Í fjør vísti liðið fótbóltsligar dygdir. Higartil í ár hevur tað verið torførari. Men vit kníta nevarnar saman og leita aftur til grundarlagið. Vit stríðast, og vit rokna avgjørt við, at tað fer at verða betri, sigur Skála venjarin, sum hevur allar sínar menn tøkar undan ferðini suður á Argir.
Í fjør gekk tað av skriðuni nógvu tey fyrstu umførini hjá AB, áðrenn tað vendi:
– Tað var gott dømi um, at tað er neyðugt at venja seg við nýggju umstøðurnar eftir uppflytingina, staðfestir Eliesar Olsen.
Nýggjar avbjóðingar hjá NSÍ
Tað gongur sum eftir ánni hjá NSÍ. Eftir trý umfør í landskappingini eru teir gulu úr Runavík einasta liðið við fullari úrtøku. Málmunurin er 9-1, og sunnudagin var úrslitið á Vágseiði 4-0 sigur á FC Suðuroy í steypakappingini.
Trygvi Mortensen, NSÍ venjarin, er sjálvandi væl nøgdur við gongdina higartil. Samstundis vísir hann á, at nú bíðar nýggjur partur og aðrar fyritreytir enn tær, sum higartil hava verið:
– Vit hava spælt ímóti uppflytarunum og ímóti AB, sum í fjør var nýtt lið í deildini. Sjálvandi kunnu vit bara fegnast um, at vit higartil hava vunnið fulla úrtøku, og at tað hevur gingið væl við bæði at skjóta mál og verjupartinum. Spælararnir hava vult og heilt hildið seg til tað, ið frammanundan er avrátt, og í Vági bar til at lata onkrar at royndu monnunum hvíla eitt sindur. Men vit vita eisini, at nú bíða stórar avbjóðingar á útivølli. Vit skulu til Fuglafirðar, í Gundadal ímóti HB og so tvær ferðir til Streymnesar at hitta EB/Streym í landskappingini og steypakappingini.
Hvat rokna tit við?
– Vit gera okkara besta, og vit vóna sjálvandi altíð, at tað skal eydnast at vinna. Vit vita, at vit fara ikki at vinna allar dystirnar. Saman við spælarunum hava vit sett okkum mál fyri næstu fýra dystunum á útivølli, men eg haldi, at vit fara at halda hetta fyri okkum sjálvar.
Hvussu vit ÍF?
– Eg sá teir í Gundadali ímóti HB. Teir taptu, men serliga í 2. hálvleiki sá tað gott út, og sunnudagin hoyrdu vit, at Clayton Soares er við at finna netið í mótstøðumálinum. Oyggjauppgerðirnar eru altíð undirhaldandi og spennandi, og í Fuglafirði er torført at spæla ímóti ÍF. Vøllurin er ikki so breiður sum aðra staðni, og ÍF liðið er serliga væl fyri í høvuðspælinum, sigur Trygvi Mortensen.
Í Fuglafirði fegnast teir um, at Jan Ó. Ellingsgaard aftur er tøkur. Hann er komin heim av flatlondum í páskafrí.
Jákup Mikkelsen er so smátt farin av venja aftur. Hann hevur framvegis trupulleikar við knænum.
– Eg fari at spæla aftur, men tað er ikki greitt enn, nær tað verður, sigur veteranmálverjin.
Hvussu er liðið sammett við í fjør?
– Liðið hjá okkum er gott og kanska betri enn í fjør, tá ið vit vunnu silvur. Tað er kapping um plássini, og spælararnir geva seg fult og heilt í venjingunum, sigur Jákup Mikkelsen.
Í Fuglafirði hava bæði Fritleif í Lambanum og Høgni Zachariassen verið á vongverjanum í vinstru. Í miðverjuni hevur Poul N. Mikkelsen spælt allar dystirnar á tamb, og á framrættaðu plássunum bjóðar Ari Ó. Ellingsgaard av í kapping við Nenad Saric og Dánjal á Lakjuni.
Ivi um KÍ toppskjúttan
Tað gongur striltið fyrstu umførini hjá EB/Streymi. Soleiðis plagar tað at vera, og soleiðis hevur tað víst seg at verið fyrstu umførini í ár.
Skaðar hava darvað, men nú hevur Rúni Nolsøe allar sínar menn tøkar, tá ið sæð verður burtur frá Arnar Dam, sum er langtíðarskaddur.
Arnbjørn Hansen og Leif Niclasen eru báðir komnir fyri seg aftur. Í steypadystinum síðsta sunnudag í Gundadali vísti Arnbjørn, at máltevinum bilar einki.
Hjá KÍ er verri statt. Í fjør skoraðu Álvur F. Christiansen og Páll A. Klettskarð flestu málini. Higartil hava teir ikki verið darvaðir og tískil ikki so eyðsýndir sum málskjúttar. Soleiðis er tað framvegis. Tað verður ikki fyrrenn stutt undan dystarbyrjan, at tað verður greitt, um Páll verður førur fyri at spæla.
Rodrigo vísti mikukvøldið við tveimum málum á næstbesta liðnum, at hann er førur fyri at spæla. Hann verður við, og tað er ein møguleiki fyri, at hann verður millum teir fyrstu ellivu.
Stórt mannfall á Toftum
Marginalirnir hava higartil ikki verið við Víkingi. Í steypadystinum ímóti Skála eydnaðist tað at vinna 2-0, og sum tíðin leið kundi málmunurin verið uppaftur størri.
Í oyggjauppgerðini ímóti fyrrverandi Víkinga venjaranum, Jógvan Martin Olsen, og B68 í Serpugerði er heimaliðið at rokna sum greiður favorittur.
Á Toftum er mannfall, sum rakar meint. Málverjin, Kristian Joensen, og bestu álopsessini Jonleif Højgaard og Óli Højgaard Olsen eru ikki tøkir, og Evrard Blé, sum saman við Jann Inga Petersen varð roknaður at vera royna álitið á miðvøllinum, er framvegis skaddur.
Ragnar Lindholm er avloysari millum stólparnar. Øssur Hansen og Jógvan Martin Olsen verða noyddir at fremja fleiri broytingar, tá lyklaspælarar eru burturfrá.
Tí ræður um at brynja seg við góðum hugburði og sjálvsálitinum, sum óroyndu toftamenninir í løtum – men ikki altíð – hava víst higartil í ár.
