ST-aðalskrivarin, António Guterres, kemur í kvøld við einari nýggjari áheitan um at tryggja neyðhjálp til krígsherjaða fólkið í Gazageiranum.
Hann heitir á partarnar í stríðnum um at tryggja, at fleiri lastbilar kunnu koma til krígsherjaða økið - uttan seinkingar.
- Humanitera skipanin í Gaza stendur yvirfyri einari fullkomiligari samansøkking - ella kollapsi, sum tað eisini kann sigast.
Sambært Reuters leggur ST-aðalskrivarin dent á, at avleiðingarnar fyri fleiri enn tvær miljónir sivilar íbúgvar í Gaza kunnu gerast ófatiligar.
António Guterres hevur eisini skotið upp, at skipað verður ein humaniter vápnahvíld, sum kann tryggja neyðhjálp til íbúgvarnar í Gazageiranum.
