Minst ein lærari og sjey skúlabørn fingu skaða, tá ein bumba brast uttan fyri ein palestinskan skúla í Eysturjerusalem gjáramorgunin. Blaðið Jerusalem Post visti at siga, at løgreglan hevði fingið boð frá einum víðgongdum jødiskum felagsskapi, at tað var hann, sum hevði skipað fyri spreingingini í skúlagarðinum. Í boðunum frá felagsskapinum stóð, at atsóknin var hevnd fyri tilburðin, tá tíggju ísraelsmenn doyðu í einari atsókn í Beit Yisrael seinasta leygardag, og at felagsskapurin fer at hevna øll ísraelsk børn, sum doyggja í palestinskum atsóknum.
Tey 600 børnini í skúlanum vórðu alt fyri eitt flutt burtur haðani. Stutt eftir funnu trygdarmenn tvær aðrar bumbur í kloakkini við skúlan, men tað eydnaðist at taka tær sundur, áðrenn tær brustu.
Ófriðarligt
Dagurin í gjár var ógvuliga ófriðarligur. Tíðliga gjáramorgunin sprongdi ein palestinskur sjálvmorðsbumbumaður seg sjálvan í luftia í einum bussi har norðuri í Ísrael. Ellivu fólk fingu skaða.
Nakrar fáar tímar frammanundan skjeyt ein palestini fólk, sum, sótu á einari matstovu í Tel Aviv. Trý fólk doyðu, og minst 25 vórðu særd.
Eisini her var talan um hevnd, tí stutt eftir atsóknina boðaði tann víðgongdi palestinski felagsskapurin Al-Aqsa frá, at tað var ein av hansara limum, sum hevði skotið fólkini á matstovuni fyri at hevna, at ísraelski herurin hevði myrt kvinnur og børn í Ramallah og Jenin.
