Tann sterka bumban, sum vigaði eitt tons, drap ikki bara Hamas-leiðaran Saleh Shehadah og varaleiðara hansara, men eisini trettan sivilfólk. Níggju av teimum, sum doyðu, vóru børn, og Ísrael hevur verið fyri hvøssum atfinningum síðani álopið.
Formaðurin í ísraelska tjóðartinginum, Moshe Katsav, segði fyrrapartin í gjár, at eitt óhapp hendi undir álopinum á Gaza bý, og at tann politiska leiðslan noyðist at átaka sær ábyrgdina av tí, sum hendi.
Serliga eftirlitstænastan hjá herinum og trygdartænastan Shin Bet fóru týskvøldið undir at kanna, hvat hendi, tá avgjørt varð at bumba íbúðarhúsini í Gaza býi.
Ísraelskar hernaðarkeldur søgdu við blaðið Haaretz í gjár, at tað var eitt mistak at lata eitt F16-flogfar tveita ta sterku bumbuna niður yvir íbúðarhúsini. Keldurnar vístu á, at ætlanin var bara at raka fýra av teimum, sum doyðu. Hini vóru í húsum í grannalagnum, sum eisini fóru í sor av teirri sterku bumbuni. Sambært Haaretz hevði herleiðslan vissað politikararnar um, at grannahúsini fóru bert at fáa smávegis skaða av bumbuni.
Silvan Shalom, varaforsætisráðharri sigur við Haaretz, at herurin hevði leingið fyrireikað álop á íbúðarhúsini, har Hamas-leiðarin búði, men at politiska leiðslan hevði útsett álopið fleiri ferðir, tí vandin fyri at raka sivilfólk var ov stórur.
- Eingin eigur at halda, at forsætisráðharrin, verjumálaráðharrin ella ovastin í herleiðsluni høvdu góðkent álopið, um teir vistu, at tað fór at raka sivilfólk, sigur ísraelski varaforsætisráð-harrin við blaðið.
