Undrunarsama vitjanin í Grønlandi hjá soni hjá Donald Trump verður ein persónlig dagsferð.
Donald Trump Jr. verður sostatt ferðafólk og ikki í embætisligum høpi, tá hann í dag fer úr flogfarinum í Nuuk.
Sambært TV 2 sigur hann hetta í sínum egna podcasti "Triggered" í einum innslagi, sum kom út í gjárkvøldið.
- Nei, eg keypi ikki Grønland. Stuttligt nokk, eg fari faktiskt ein sera langan persónligan dagstúr til Grønlands í morgin. Eg hoppi á Trump Force 1 og lendi í Grønlandi fyrrapartin í morgin, sigur hann í podcastinum.
Hann sigur eisini, at hann leingi hevur ynskt at fara til Grønlands.
– Eg elski Grønland. Eg skuldi havt verið har í mars í fjør á moskusoksaveiðu, sigur hann.
Vitjanin elvir til øsing, tí hon kemur eftir útsagnir frá Donald Trump um, at hann sum næsti amerikanski forseti fer at tryggja ognarrættin til Grønland.
Donald Trump er framvegis á tí leiðini, og í gjárkvøldið skrivaði hann á sosialu miðlasíðu síni Truth, at Grønland skal "gerast stórt aftur" - eitt orðaspæl við hansara egna slagorði um at gera Amerika stórt aftur.
Sonurin heldur seg tó frá at fara so langt í sínum samskifti.
Í podcasti sínum vísir hann á eitt meira friðarligt ynski um at hitta fólk á staðnum og taka upp video.
– Vit vilja møta fólki, tí tað tykist sum eitt ótrúligt stað, so vit roknaðu við, at vit skuldu fara at heilsa uppá og kanska taka nøkur video, sigur hann, sambært TV 2.
/Ritzau/
