Í seinasta lagi um tvey ár, verður aftur løgtingsval, og tað er Javnaðarflokkurin so smátt farin at fyrireika seg til.
Í hesum sambandi hava tey gjørt av, hvussu valevnini skulu býtast ímillum tey ymsu økini í landinum. Allar Føroyar eru eitt valdømi, so tað eru ongar fastar reglur fyri, hvar í landinum, valevnini skulu finnast.
Men Javnaðarflokkurin hevur gjørt av at býta tey so kristiliga ímillum øll øki í landi um, Sostatt er avgerð tikin um, at tey ymsu økini fær eitt valevni fyri hvørji 1.500 fólk í økinum, og búgva færri enn 1.500 fólk í einum øki, fáa tey eitt valevni.
Í hesum sambandi hevur Javnaðarflokkurin býtt landið sundur í sjey øki og økini eru tey somu, sum vóru fyrr, tá ið landið var sjey sjálvstøðug valdømi, nevniliga Norðoyggar, Eysturoy, Norðstreymoy, Suðurstreymoy, Vágar, Sandoy og Suðuroy.
Tilsamans er sostatt ætlanin at stilla 33 valevni upp. Norðoyggjar fáa fýra valevni, Eysturoyggin fær sjey valevni, Norðstreymoy og Vágar fáa tvey valevni í part, Suðurstreymoy fær heili 14 valevni, Sandoyggin fær eitt valevni.
Suðuroyggin fær trý valevni, men í Suðuroy eru tvey lokalfeløg hjá Javnaðarflokkinum og tey skulu so býta tey trý valevnini ímillum sín. Sostatt fær Suðuroyar syðra javnaðarfelag eitt valevni og Suðuroyar norðara Javnaðarfelag fær tvey valevni.
