Kl.13.00 í dag spælir føroyska kvinnulandsliðið seinasta og avgerandi dystin í HM-undankappingini, sum hevur verið í Føroyum síðani hósdagin.
Mótstøðuliðið í dag er Turkaland, sum – eins og Føroyar – hevur vunnið teir báðar fyrstu dystirnar í bólkaspælinum. Tískil verður dysturin í dag avgerandi fyri hvør fer víðari.
Tað eru nevniliga allir bólkavinnararnir, ið sleppa víðari til næsta stig av undankappingini. Tó sleppur ein av teimum fýra 2-arunum í undankappingini eisini við.
Fyri at sleppa víðari sum 2-ari er kravið, at liðið hevur staðið seg betur ímóti nummar eitt og trý í sínum bólki, enn allir hinir 2-ararnir hava ímóti nummar eitt og trý í sínum bólki.
Vinna Føroyar ímóti Turkalandi í dag, so sleppa tær víðari, men skuldu tær spælt javnt ella tapt, so verður tað eitt størri roknistykki hvør sleppur víðari sum besti 2-ari.
Skuldu Føroyar blivið nummar tvey í bólkinum, so er tað longu nú greitt, at Føroyar hava fingið trý stig ímóti nummar trý í bólkinum. Tað verður nevniliga Montenegro ella Luksemburg, og teimum báðum hava Føroyar vunnið ímóti.
Allir dystirnir í HM-undankappingini í dag byrja kl.13.00. Rás2 sigur beinleiðis frá dystinum ímillum Føroyar og Turkaland, ið verður á Tórsvølli.
