Klaksvík: Fríggjamorgunin lógu allir teir smáu snellubátarnir bundnir við kai í Klaksvík.
Nakrir av smáu bátunum vóru annars farnir avstað tíðliga fríggjamorgunin, men teir vendu aftur, tí tað var so ringt í sjónum.
Størru bátarnir komu á Norðhavið, og veðrið var brúkiligt hjá teimum.
? Eg fór ongantíð avstað í morgun, tí líkindini vóru so vánalig. Aðrir royndu, men veðrið var ikki til tað, sigur Palli Jacobsen, sum rør út við Krossteini.
Góðan túr mánadagin
Báturin hjá Palla liggur við bátabrúgvarnar í Klaksvík, og hendan fyrrapartin er hann farin í holt við onkrar smærri umvælingar umborð á bátinum.
? Tað er altíð okkurt sum kann gerast ein slíkan dag sum í dag, tá vit ikki sleppa út, sigur hann.
Mánadagin var hinvegin ein góður dagur hjá Palli. Teir vóru tveir við Krossteini á Norðhavinum og fingu næstan 2700 pund.
? Á døgurða høvdu vit fingið eitt tons. Fyrrparturin royndist væl, og fiskurin var stórur. Aftaná døgurða gekk minni væl, men samanumtikið var tað ein góður túrur, sigur hann.
Avreiða á Uppboðssøluni
Palli hevur verið tríggjar túrar higartil, og hann vónar, at hann sleppur avstað aftur í dag.
Bátarnir í Klaksvík avreiða allir á Fisknamarknaðinum í Klaksvík, og tá allir bátarnir koma aftur ímóti kvøldi, er nógvur aktivitetur við Kósabrúnna.
? Tað gongur rættiliga væl við at sleppa fram at eftir tørni, sigur Palli Jacobsen.
Dagurin í gjár var eitt sindur meiri friðarligur á uppboðssøluni, tí tað vóru bara teir størru bátarnir, sum vóru úti.
