Síðst í september fara tey fýra amerikonsku F-15 jagaraflogførini og tær báðar amerikonsku Sikorsky-bjargingartyrlurnar av støðini í Keflavík, og saman við teimum fara næstan øll tey umleið 1200 amerikonsku starvsfólkini av støðini.
Amerikanski sendiharrin í Reykjavík hevur sagt, at tað er George W. Bush, forseti, sum hevur gjørt av at taka flogførini og tyrlurnar úr Íslandi, tí brúk er fyri teimum aðrastaðni.
Boðini fekk íslendski uttanríkisráðharrin, Geir Haarde, frá amerikanska varauttanríkisráðharranum Nicholas Burns í telefonini mikukvøldið, og tey hava vakt stóran ans í Íslandi. Sambært einari avtalu frá 1951 hevur USA skyldu til at verja Ísland hernaðarliga, og tí eru nógvir íslendingar vónsviknir av, at amerikanararnir gevast við so stuttari freist.
Vit eru sera misnøgd við amerikonsku avgerðina. Hetta styrkir ikki viðurskiftini ímillum londini. Soleiðis bera vinir og sameindir seg ikki at ímóti hvør øðrum, segði Halldór Ásgrímsson, forsætisráðharri, í gjár. Samstundis boðaði hann frá, at hann hevur gjørt av at senda Bush, forseta eitt bræv við kravi um eina frágreiðing úr Hvítu Húsunum. Halldór Ásgrímsson hevur eisini tosað við leiðsluna í NATO um málið.
Sambært fjølmiðlunum eru nógvir íslendingar skelkaðir av amerikonsku avgerðini, tí íslendska stjórnin tók undir við amerikonsku innrásini í Irak, sjálvt um nógvir íslendingar vóru ímóti. Er hetta takkarlønin, spyrja nógvir íslendingar nú.
