Lutakast til steypakappingina í fótbólti var at síggja í 3-2 í Kringvarpinum í kvøld.
Lutakastið er skipað soleiðis, at fimm lið vóru í fyrsta pottinum, har tveir innleiðandi dystir verða spældir. Eftir hetta er ikki talan um styrkismeting, og tí kunnu nøkur av stóru liðunum bresta saman alt fyri eitt.
Og hetta hendir aftur í ár. Í fyrsta umfarinum verður talan nevnliga um grannauppgerð millum tey bæði stóru havnarfeløgini, HB og B36.
Til stuttleikar kann viðmerkjast, at hetta kanska eru góð tíðindi fyri tey í HB-leguni, sum halda, at tað er alt ov langt síðani, at HB seinast vann steypakappingina. Hagtølini staðfesta nevnliga, at B36 seinastu trý árini hevur tapt í fyrsta umfarinum av kappingini um løgmanssteypið, og at mótstøðuliðið hesi trý árini síðani hevur vunnið kappingina um Løgmanssteypið.
Lutakastið í kappingini um løgmanssteypið háttaði sær annars soleiðis:
1. umfar
Undrið-MB
Giza/Hoyvík-B71
1/8-finalur
FC Suðuroy-NSÍ
Víkingur-Skála
AB-TB
HB-B36
ÍF-Undrið/MB
Giza-Hoyvík/B71-EB/Streymur
KÍ-07 Vestur
B68-Royn
