Í síðstu viku vóru boð eftir sløkkiliðnum í Klaksvík tvær ferðir sama dag. Og hesi útkallini eru grundarlag fyri atfinningum í Norðlýsinum, sum kom fríggjadagin.
Í lokalblaðnum hjá norðoyingum finnist ein lesari at tí, sum hann nevnir skilaleysa koyring í sambandi við fyrra eldin. Tá skuldi sløkkilið á bedingina, har eldur var umborð á Pison.
Í eini aðrari grein í Norðlýsinum fríggjadagin ivast blaðið í, um tað er ráðiligt, at sløkkiliðið í Klaksvík skal røkja uppgávurnar norðanfyri tunnlarnar.
Kemur eldur í í Klaksvík, meðan sløkkiliðið er á Viðareiði, so kann verulig vanlukka spyrjast burtur úr, heldur blaðið.
Seinna útkallið í síðstu viku var til Norðdepil, har eldur var í einum húsum, og hetta hevur fingið Norðlýsið at seta spurning við trygdina, tá sløkkilið skal sløkkja eld allastaðni, har landfast er.
? Um sløkkiliðið í Klaksvík skal røkja bygdirnar, har landfast er, má sløkkiliðið útbyggjast meira, heldur blaðið.
