Tá ið fólk eiga børn, og fara í barnsburðarfarloyvi, eiga tey at fáa fulla løn. Tað heldur Turið. F Arge, rakstrarstjóri í einari av okkara stóru fyritøkum, BankNordik.
Eftir barsilsskipanini kunnu tey, sum fara í barnsburðarfarloyvi í mesta lagi fáa 25.000 krónur um mánaðin. Tað merkir, at tað eru rættiliga nógv, sum missa rættiliga fitt í løn ta tíðina, tey eru í farloyvi. Men í BankNordik, hava tey, av sínum eintingum, gjørt av, at tey, sum fara í barnsburðarfarloyvi, skulu ikki missa inntøku og tí fáa tey fulla løn alla tíðina.
Sum barsilsskipanin er nú, er hon við til at varðveita ein skeivleika í samfelagnum, har kvinnur taka meginpartin av farloyvinum, sigur Turið F. Arge í einum skrivi í gjár. Hon sigur, at var hámarkið upp á 25.000 krónur tikið av, høvdu tey, ið hava størstu inntøkurnar – og sum sostatt rinda mest til barsilsskipanina – eisini fingið mest útgoldið.
– Hetta hevði gjørt tað lættari hjá familjuni at latið tann, ið hevur størstu inntøkuna, farið í barsilsfarloyvi, av tí at tað ikki hevði havt ein fíggjarligan miss við sær, sigur hon.
Men hon leggur afturat, at vilja vit av álvara flyta okkum fram á á hesum øki, eiga vit at marka ein størri part av barnsburðarfarloyvinum til pápan. Hetta er ein spurningur, sum javnan er til umrøðu á Løgtingið, men higartil hava politikarar ikki viljað vita av at vit skulu hava pápakvotur í barsilsskipanini.
