Grønlendska miðlahúsið Sermitsiaq leggur síni bæði bløð AG og Sermitsiaq saman í eitt samanlagt blað.
Samstundis verður Nuuk Ugeavis, sum hevur verið ókeypis vikublað síðani 1980-árini, niðurlagt.
Tað upplýsir grønlendska kringvarpið KNR.
Sambært stjóranum og ábyrgdarblaðstjóranum á Sermitsiaq, Masaana Egede, stendst niðurleggingin av Nuuk Ugeavis orsakað av talgildu gongdini.
- Gongdin á marknaðinum hevur gjørt, at tað ikki ber til at halda fram á ein búskaparliga burðardyggan hátt, sigur hann við KNR.
Seinasta útgávan av Nuuk Ugeavis kemur væntandi út í desember 2025.
AG og Sermitsiaq koma framyvir út sum eitt samanlagt blað fyri vikuskiftið.
- Vit leggja saman, tí vit vilja skapa eina sterkari prentvøru til okkara lesarar, skrivar Masaana Egede í tíðindaskrivi.
- Við einum vikuskiftisblað fært tú bæði tær stóru tjóðarsøgurnar, vinnutíðindi og tað menniskjaliga og inniliga úr alheiminum hjá AG í eina umfatandi útgávu.
AG verður framyvir eitt ískoyti sum kemur út inni á blaðnum Sermitsiaq. Umskipanin er liður í eini størri talgildgerð av miðlahúsinum.
Nýggja vikuskiftisblaðið kemur út fyrstu ferð í januar 2026.
Feløgini aftanfyri Atuagagdliutit Grønlandsposten (AG) og Sermitsiaq fusioneraðu í 2010.
Síðani hava bløðini framhaldandi verið útgivin hvør sær í prenti. Hetta endar við árslok 2025.
/Ritzau/
