Við telduskrivi, dagfest 9. oktober 2013, hevur A vegna B sent umboðsmanninum eina klagu um handfaringina hjá Almannaverkinum av einari innlitsáheitan, dagfest 4. juli 2012, til Almannaverkið.
Klagarin vísir í klaguni á, at hann sendi fleiri áheitanir til Almannaverkið um at fáa svar, og at hann í skrivi, dagfest 29. november 2012, frá Almannaverkinum fekk at vita, at hann hevði partvíst rætt til innlit, og at skjølini fóru at verða send skjótast møguligt.
Umboðsmaðurin gjørdi av at kanna hetta málið nærri, og við skrivi, dagfest 11. oktober 2013, varð klagan send Almannaverkinum til ummælis, samstundis sum biðið var um at læna øll skjøl í málinum.
Við skrivi, dagfest 11. november 2013, fekk klagarin innlit í umbidna málið, eins og umboðsmaðurin fekk avrit av teimum skjølum, sum klagarin hevði fingið innlit í.
Sambært § 16, stk. 1 og 2 í innlitslógini (løgtingslóg nr. 133 frá 10. juni 1993 um innlit í fyrisitingina, sum broytt við løgtingslóg nr. 76 frá 8. mai 2001) hava myndugleikar eina serliga lógarásetta skyldu at svara innlitsumbønum skjótast gjørligt og ein myndugleiki skal tí sum skjótast gera av, um ein áheitan um innlit kann verða gingin á møti.
Um ein áheitan um innlit ikki er gingin á møti ella noktað innan 10 dagar eftir, at viðkomandi myndugleiki hevur móttikið hana, skal myndugleikin boða viðkomandi frá um orsøkina til hetta, og nær ein avgerð væntandi verður til skjals.
Almannaverkið hevur í frágreiðing til mín víst á, at tað sambært skjølunum í málinum ikki sæst, hví innlit ikki varð givið, og at orsøkin tykist vera, at málið av misgáum ikki varð avgreitt.
Ikki fyrr enn umboðsmaðurin kom inn í málið, verður innlitsumbønin avgreidd. Tað gingu sostatt 1 ár og 4 mánaðir, frá tí at klagarin bað um innlit, til klagarin fekk innlit í málið. Hetta haldi eg vera alt annað enn nøktandi, og fari tí at geva Almannaverkinum eina átalu fyri handfaringina av hesum máli.
Hetta skriv er eisini sent klagaranum til kunningar og verður í næstum almannakunngjørt á heimasíðu okkara í navnleysum líki.
