Tað gongur als ikki soleiðis hjá Skála, sum tað gjørdi undan summarteðginum.
Síðsti dysturin undan summarsteðginum var 27. juni, tá ið Skála vann 3-0 á útivølli ímóti B71. Tað var sætti dysturin á rað, at Skála vann úrtøku – fimm sigrar og ein javnleikur.
Í kvøld spældi Skála triðja dystin síðani summarsteðgin. Í kvøld var tað á útivølli ímóti KÍ, eftir at Skála hevur tapt 2-1 á heimavølli ímóti NSÍ og 2-0 á heimavølli ímóti EB/Streymi.
Í kvøld var talan um fyrsta dystin í 18. umfari. Hann var lagdur at vera í kvøld, tí hetta skuldi verða hóskvøldið á summarfestivalinum.
Líkindini vóru sera góð, og lagið í heimaleguni er gott, tí teir næstbestu hjá KÍ vunnu 2-1. Øll málini vórðu skorað í seinna hálvleiki.
Boris Dosljak átti uppleggið, tá ið Kristoffur Jakobsen tíggju minuttir eftir steðgin legði KÍ á odda 1-0. Tað restaðu 20 minuttir, tá ið Niels Pauli Danielsen eftir hornaspark javnaði til 1-1. Tá átti Poul Kallsberg uppleggið.
Tíggju minuttir undan leikloki skoraði Dávid Langgaard sigursmálið, so KÍ vann 2-1. Aftur var tað Boris Dosljak, sum átti uppleggið.
Tølini siga, at Skála hevði sjey hornaspørk og KÍ fýra, og at Skála hevði seks royndir ´+a og framvið KÍ málinum, og at KÍ hevði fýra royndir á og framvið málinum hjá Skála.
Boris Dosljak var á vøllinum allan dystin á tamb, og Jóannes Bjartalíð varð skiftur út, tá ið ein tími var farin.
Skála er topplið við 37 stigum. Tað eru átta stig aftur til B71, sum leygardagin fer at spæla á útivølli ímóti B36.
KÍ hevur 19 stig og er eitt stig frammanfyri HB, ið er næstaftast. HB fer leygardagin at spæla á útivølli ímóti Víkingi.
