2. deild NSÍ-Skála 3-1 (3-0)
Á Skála hava teir ikki so ógvuliga breiðan hóp, og tá onkrir vóru á U-18 landsliðnum í hondbólti, og onkur gekk skaddur uttanfyri, so tóktist sum um tað væl merktist á fyritreytunum inni á vøllinum.
Dysturin í Runavík byrjaði klokkan sjey leygarkvøldið, og tað var sera linligt. Tað tóktist sum um allur fótbólturin, ið hevði verið fyrr um dagin ? bæði á vøllinum og í sjónvarpinum ? hevði sett dám á, og ferðin gjørdist ongantíð serliga stór.
Heimaliðið hevði Mortan Hansen í álopinum, og tað var munurin. Ungi maðurin hevur verið skaddur eitt skifti, og tí hevur hann hesar síðstu vikurnar ikki verið í 1. deild, men við avrikunum, sum hann framdi í vikuskiftinum, í huga, so verður tað neyvan leingi, til Trygvi Mortensen aftur fer at geva honum møguleikan millum teir fremstu.
Skála royndi nógv við longum bóltum, men málmøguleikarnir, sum teir fingu burturúr, kundu teljast á aðrari hondini.
Heimaliðið hevði betri tak á, og teir fingu hol á, tá 32 minuttir vóru farnir. Mortan Hansen gjørdist púra leysur við málverjanum hjá Skála, Paula Hansen, og álopsmaðurin var nóg kaldur til at lyfta upp um málverjan. Seks minuttir seinni økti sami maður. Hesa ferðina sendi hann við høvdinum hornasparksinnlegg úr vinstru og í kassan.
Petur Hammer økti til 3-0 eina lítla løtu undan steðginum. Eitt hornasparksinnlegg úr høgru varð snittað víðari, og miðvallarin setti krúllin undir bóltin, sum fór í kassan.
Skálamenn svaraðu ikki aftur fyrrenn 77 minuttir vóru farnir. Agnar Højgaard, sum má metast millum veteranarnar á liðnum, gjørdist leysur í brotsteiginum og sendi bóltin í málið hjá Ólavi Højgaard.