Dagstovnur
Fríggjadagin varð dagstovnurin, sum Búsetur byggir á Skála fyri Runavíkar kommunu, reistur.
Fleiri arbeiðstakarar eru við í verkætlanini, sum Búsetur stendur fyri. Tað er eisini Búsetur, sum hevur gjørt verkætlanina og hevur tillagað hana eftir ynskjum frá Runavíkar kommunu.
Liðugur í ár
Nú dagstovnurin er innilokaður, verða vindeyguni sett í, eins og bygningurin verður gjørdur liðugur uttan.
Alt el-og hvs-arbeiði verður eisini gjørt liðugt, eins og skilaveggir verða settir upp.
Sagt verður á Skála, at arbeiði hevur gingið væl, og ætlandi stendur nýggi dagstovnurin liðugur seinni í hesum árinum.
Bygningurin er 750 fermetrar í einum plani, og pláss verður fyri 60 børnum í vøggustovu og barnagarði.
Arbeiðstakarar
Tað er Búsetur, sum stendur fyri øllum arbeiðnum og ger timburarbeiði, men fleiri ymiskir arbeiðstarkar eru í verkætlanini.
Zacharias Leitisstein ger hvs-arbeiði, og LM Electric ger el-arbeiði. JHR-entreprenørar gera alt kloakkarbeiði, bæði inni og úti, meðan Stoyp ger alt betongarbeiði.
Runavíkar kommuna stóð sjálv fyri planeringini av økinum, har nýggi stovnurin verður bygdur.
