Bjarni Djurholm
Í november kunnaði løgmaður landsstýrið um, at hann hevði tikið avgerð um at stovna sendistovu Føroya í Reykjavík. Uppskotið skuldi á fíggjarlógina fyri 2007. Løgmaður fekk fulla undirtøku fyri ætlan síni.
Tá uppskot løgmans var orðað, var tað í samsvari við uttanríkispolitisku heimildirnar soleiðis, at vit kunnu fáa sendiumboð í Íslandi við somu tign, sum okkara sendimenn í Bruxelles og London hava.
At sendiumboð okkara skuldi vera partur av donsku attachéskipanini í Íslandi gjørdi undirritaða nakað ivandi, tá Ísland av mongum – og av røttum, verður fatað øðrvísi enn onnur lond (sum eisini Poul Mohr lýsti herfyri). Tí varð bíðað við spenningi eftir hvat løgtingið fór at siga.
19. desember legði fíggjarnevndin álit fyri løgtingið, og varð allur ivi hjá undirritaða gjørdur til skammar.
At meirlutin í fíggjarnevndini tók undir við uppskoti løgmans var kanska væntandi, men eisini minnilutin, tjóðveldið, duplaði uppskot løgmans í sínum áliti við hesi orðing (beinleiðis endurgivið):
»Í sambandi við, at Hoyvíkssáttmálin er komin í gildi, eru vit nú komin til, at tað er av stórum týdningi, at føroysk sendistova verður sett á stovn í Íslandi, sum kann hjálpa føroyska vinnulívinum og føroysku almennu skipanini á staðnum. Tískil hevur Landsstýrið avgjørt at seta eitt sendiumboð við somu tign, sum okkara sendimenn í Brússel og London, í Íslandi. Sendiumboðið verður partur av donsku attachéskipanini og fær innivist á donsku sendistovuni í Reykjavík.«
Sostatt tók tjóðvelið ikki bert undir við orðing løgmans, men gjørdi hana beinleiðis til sína egnu. Atkvøðuúrslitið í løgtinginum var eisini samsvarandi markleysu vælvildini. 21. desember varð uppskotið samtykt við 32-0-0 atkvøðum! Ja, tú lesur rætt – 32 tingmenn atkvøddu ja, eingin blankt og eingin nei.
Allir tinglimir atkvøddu fyri, at sendiumboð Føroya í Íslandi skal vera partur av donsku attachéskipanini og fáa innivist á donsku sendistovuni í Reykjavík.
Undirritaði var ovfarin av hesi málsgongd. Men tingið ger, tað tingið vil - og løgtingið hevur altíð rætt. Sendistova okkara í Íslandi var soleiðis við løgtingslóg løgd til løgmann at avgreiða.
Bróta lóg
Síðani hava fyrispurningar verið í tinginum, viðgerð í miðlunum og nú uppskot til samtyktar um at steðga løgmanni í Íslandi!? Nú skal løgtingið heita á løgmann um at bróta lógina, sum alt løgtingið samtykti 21. desember? Er ketan ikki púra lopin av?
Spurningar og uppskot eru tær beru eftirrationaliseringar. Nú verður symbolikkurin dyrkaður fyri at tekkjast nøkrum veljarum.
Sjálvsagt skal Merkið í húnar hátt í Reykjavík, og sjálvsagt skulu vit hava ta tign, sum okkum tilkemur sum tjóð. Hesum virkar løgmaður fyri. Tað álit hevur undirritaði á honum.
Men at viðgera spurningar og uppskot í tinginum um at steðga løgmanni, og fáa hann at bróta løgtingslóg, sum 32 tinglimir hava samtykt, er beinleiðis komiskt, fyri ikki at siga tragiukomiskt.
Undarligt, at fjórða statsvaldið í sínum avdúkandi journalistikki ikki hevur varnast hetta?
