Í morgin, leygardagin, gevur Sissal kampmann nýtt yrkingarsavn út.
Savnið hevur fingið heitið, 4D, og tað er í fýra pørtum.
Heitið á savninum kemst av at tað er í fýra pørtum og av, at allir partarnir byrja við bókstavinum, D: Deyðin, Dreymarnir, Deyðatroytti gerandisdagur og Deyðssyndirnar.
Evnini í savninum er fyrst og fremst menniskjaveran, menniskjalívið.
- Tað snýr seg um tað trídimensionella, men fjórða dimensiónin, rúmtíðin, fortíð, nútíð, framtíð, sum Einstein tosar um í sonevndu relativitetsteoriini, har rúm og tíð eru óloysiligir komponentar í einum abstraktum strukturi, er serliga sjónlig í savninum, sigur høvundurin sjálvur um savnið.
Heimið og heimini spæla ein stóran leiklut í savninum, har eg´ið leitar aftur í tíðina til støð, ið vóru, til støð, sum eru, til støð, sum finnast í andanum og kenslunum, tí fysisku, likamligu verðini og í dreymaverðini.
Evnisliga setur 4D spurningar til tað, at koma til sættis við upphavið og til tær røtur, eg-persónurin í savninum er komin úr, er vorðin ein partur av, er leysur av og úr, vendir aftur til, leggur afturum seg.
- Eg´ið leitar aftur til barndómin, til ungdómin, til vaksinlívið og til tann sannleika, at lívið einaferð er liðugt. Ein roknskapur, vit eru sett at gera hvør sær. |
