– Tað kom óvart á okkum, sum hjá so nógvum øðrum, tá ið vit frættu, at leiðandi yvirlæknin á Psykiatriska Deplinum, Tórmóður Stórá hevði tikið umsókn sína, til egið starv, aftur. Starvið sum hann hevur røkt seinastu átta árini.
Tað sigur forkvinnan í Sinnisbata, Súsanna Olsen.
Tey í Sinnisbata skilja væl, at Tormóður Stórá, umhugsar sína støðu. At lýsa eitt starv leyst at søkja einaferð enn, er eftir okkara tykki ein ábending um, at leiðslan metur, at umsøkjarin ikki er tann best skikkaði? So kann ein vísa til siðvenjur, prinsipp og aðrar subtilar grundgevingar, sum ein vil – hesar grundgevingar frá sjúkrahúsleiðsluni eru torførar at skilja, vísir hon á.
Sinnisbati spyr tí, hvat ta er, sum sjúkrahúsleiðslan væntar at fáa burtur úr at lýsa starvið leyst av nýggjum – annað enn at halda eitthvørt prinispp.
– Slík prinsippavgerð kann koma at kosta okkum nógv meira enn vit kunnu ímynda okkum. Hvat nú um Tormóður Stórá tekur avleiðingarnar av, at misálit er víst honum? Hvat um eingin søkir fasta starvið sum leiðandi yvirlækni á Psykiatriska deplinum? Føroyskir psykiatarar, sum kenna mentan okkara, og sum eru skikkaðir til leiðandi yvirlæknastørv og depilsleiðslu, hanga ikki á trøðunum og vit eiga at vera eymjúk her í útjaðaranum av Europa. Fakfólk sum Tormóður Stórá, og læknar serliga, er ein rættuliga mobil arbeiðskraft – Tormóður Stórá kann vera Psykiatriska Depilin fyri uttan! Men kann Psykiatriski Depilin vera leiðandi psykiataran fyri uttan?
Lesarabrævið frá Sinnisbata kann lesast í fullum líki VIÐ AT TRÝSTA HER
