SÍ vann sannførandi á Fleyr í oddadystinum, og KÍF vann 3-0 á TB

Hotel Djurhuus-deildin:

SÍ – Fleyr 3-0 (25-11, 25-13, 25-17)

Lítið flog var á Fleyr í oddadystinum í Sørvági í gjár, sum SÍ vann 3-0 uttan at sveitta.

SÍ fór tíðliga trý framum í fyrsta setti, og við fimm á rað gjørdist støðan 16-8, áðrenn SÍ vann settið 25-11.

Sama skil var í øðrum setti, har SÍ legði seg á odda 11-4 og 19-6, áðrenn settið varð vunnið 25-13.

Skjótt sást í triðja setti, hvønn veg tað bar, og 4-0 bleiv til 7-1 og 10-3, áðrenn SÍ vann settið 25-17.

Við sigrinum fór SÍ sjey stig framum Fleyr, á stigatalvuni, og vinnur Mjølnir trý stig í dystinum ímóti Drátti í dag, fer Mjølnir tvey stig framum Fleyr og hevur eisini ein dyst til góðar.

Sunnudagin um eina viku møtast Mjølnir og SÍ í Klaksvík. 

KÍF – TB 3-0 (25-20, 25-18, 25-14)

Eftir at KÍF hevði lagt seg á odda við fimm stigum tíðliga í fyrsta setti, kom TB afturíaftur og javnaði til 13-13 og 16-16, men fýra eftir reyv á rað kostaði dýrt, og so vann KÍF sær aftur trygga leiðslu og síðan settið 25-20.

Søgan endurtók seg í øðrum setti, har TB fylgdi við til 11-11, fyri síðan at ganga aftur eftir hæli og tapa settið 25-18.

KÍF feyk avstað í triðja settið og legði seg á odda 7-0, og tann munurin bara vaks, so hvørt settið leið, til kollfirðingar høvdu vunnið 25-14.

Um eina viku vitjar KÍF Fleyr, og tá hevur KÍF møguleikan við sigri at minka um munin upp til Fleyr til einans tvey stig.

Støðan í Hotel Djurhuus-deildini: