Seta punktum áðrenn altjóða uppgávurnar

Hesa ferð verður lands­kapp­ingin í fótbólti liðug, áðrenn tveir teir síðstu landsdystirnir verða spældir á heimavølli.
Tá ið B36 í heyst hevði kós ímóti FM heitinum, og EB/Streymur og Víkingur royndu at renna aftaná, var fram ímóti kappingarenda steðgur í kapp­ingini, tí landsliðið var niðri í Serbia. Hetta fall ikki í so góða jørð hjá øllum. Tað vóru teir, sum vístu á, at tað var so ymiskt, sum landsliðsferðin órógv­aði feløgini.
Í onkrum av feløgunum bar tað venjarunum til at leggja venjingarnar til rættis sum vanligt, tí eingin spælari var burtur í landsliðsørindum, og í øðrum feløgum vóru fleiri spæl­ararar burtrurfrá í altjóða ørindum.
Á eftirmetingarfundinum í heyst varð breið semja um, at tað nú skal leggjast soleiðis til rættis, at punktum verður sett í landskappingini, áðrenn tveir teir síðstu dystirnir í HM undankappingini í oktober verða spældir.
Nú hevur FSF boðað feløg­unum frá, at ætlanin er, at 27. og síðsta umfar í lands­kappingini skal verða leygar­dagin 6. oktober. Føroyar skulu spæla tveir HM undan­kapp­ingardystir á heima­vølli í oktober. Tann fyrri verður fríggja­dagin 12. oktober ímóti Svøríki, og tann seinni verður týsdagin 16. oktober ímóti Írlandi.
Soleiðis sum landskappingin nú verður skipað fer tað at bera til hjá Lars Olsen at savna landsliðið longu sunnudagin 7. oktober ella kanska heldur mánadagin 7. oktober. Og so fer at bera til at savna seg fult og heilt um stóru avbjóðingarnar ímóti Svøríki og Írlandi, uttan at endaspurturin í lands­kapp­ingini fer at spøkja, og uttan at venjararnir í feløgunum skulu hava ampa av, at allir spæl­ararnir ikki eru tøkir í síðstu fyrireikingunum til enda­spurtin í landskappingini, og uttan at venjararnir skulu hava ampa av, um nú lands­liðsspælararnir verða skaddir í altjóða dystunum.
Fyrsta umfar í lands­kapp­ingini verður sunnudagin 25. mars.