Føroyski landsliðsmálverjin, Nicholas Satchwell og liðfelagarnir í KA tóku á heimavølli móti Gróttu í dag.
Dysturin í bestu íslendsku hondbóltsdeildini á Akureyri endaði við javnleiki 33-33.
Beint undan dystarenda fekk Grótta brotskast, og tað eydnaðist Birgir Steinn Jónssyni at seta bóltin framvið Nicholas, ið fyrr í dystinum hevði bjargað einum brotskasti. Sostatt mátti KA takka til takkar við einum javnleiki.
Hetta er triðju ferð hetta kappingarárið, at KA í 12 dystum leikar javnt, og tað er rættuliga ofta í hondbóltshøpi.
Nicholas bjargaði 31 prosent av málroyndunum hjá Gróttu. Stóri leikarin hjá KA í dag var Einar Rafn Eiðsson, ið skoraði heili 17 mál fyri KA.
KA er nummar 10 í deildini við níggju stigum. Tvey stig eru upp til áttanda plássið, ið við lokið grundspæl gevur rætt til at kappast í endaspælinum.
Komandi leygardag tekur KA móti Haukum á heimavølli.