Leygardagin kl. 17 fara tríggjar skínandi barnastjørnur á pallin
á Reinsarínum í Havn. Maria á Lakjuni, Beinir Troest Rasmussen og
Rakul Ró Steintórsdóttir fara saman við góðum tónleikarum at
framføra burturúr rúgvuni av frálíkum løgum, sum tey hava
sungið seinastu 2-3 árini.
Maria á Lakjuni fer at syngja løg av
fløguni Vøkur er verðin, og Beinir fer at syngja løg av fløguni
Kom við. Báðar fløgurnar komu út í fjørsummar. Rakul Ró fer at
syngja sínar kendu Kularøtur-sangir. Eisini fara øll 3 at syngja
nøkur løg saman.
Beint fyri jól høvdu tey eina væleydnaða konsert í hugnaligu
Spaniastovu. Eftir konsertina í Klaksvík hildu tey, at tey fegin
vildu syngja fyri børnum og vaksnum i Havn eisini. Hetta verður
fyrsta ferðin Rakul Ró, Maria og Beinir syngja á Reinsarínum, og
tey vóna at síggja nógv glað andlit í nýggja árinum.
- Kanska verður pláss fyri onkrum jólalagi eisini – og nøkrum sponskum
sápubløðrum, siga ungu songfuglarnir.
