Sp/f 31.01.2011, sum eigur og rekur ísfiskalínuskipið Sandshavið, hevur keypt frystilínuskipið Kristrún, sum hevur heimstað í Reykjavík.
Umframt at hetta er frystilínuskip, er nýggja skipið hjá felagnum einar 14 metrar longri enn Sandshavið og eisini nakað breiðari.
Eyðvarur Petersen, skipari og reiðari, sigur, at Kristrún er 48 metrar langur og níggju metrar breiður, og hann væntar, at skipið verður í Føroyum um hálvan mai.
- Kristrún er framvegis til fiskiskap í Íslandi, og tá vit hava fingið skipið heim, og onkrar dagføringar eru gjørdar á skipasmiðjuni, fara vit til fiskiskap.
Hann væntar, at klárt verður at loysa umleið ein mánaða eftir, at skipið er komið heim til Føroya. Við nýggja skipinum verða einir 16 mans.
Skipið er bygt í 1988, og fyrimunirnir hjá eigarum og manning við nýggja skipinum eru, at Kristrún bæði er nógv størri enn gamla Sandshavið og hevur frysting.
- Vit hava verið tvær ferðir í Íslandi og hugt, og vit halda, at hetta er eitt gott skip, og at vit hava gjørt eitt gott keyp, sigur reiðarin og skiparin.
Enn er støða ikki tikin til, hvussu verður við Sandshavinum, sum er fyrrverandi Fugltúgvan.
##med2##
- Kvoturnar, sum vit hava, eru nøktandi til nýggja skipið, og vit halda eisini, at tað er ein stórur fyrimunur, at kvoturnar í Grønlandi og á Flemish Kap eru eginkvotur.
Eyðvarur Petersen vísir á, at í løtuni er føroyska kvotan á Flemish Kap lítil, men vónir eru um, at hon fer at veksa tey næstu árini.
- Okkara partur er seks prosent av føroysku línukvotuni á Flemish Kap og seks prosent av línukvotuni í Grønlandi. Í Íslandi eiga vit eftir núgaldandi kvotu sløk 500 tons.
Skiparin og reiðarin heldur, at tað er nógv greiðari at reka fiskiskap og finna út av sínámillum, hvør fiskar - ikki minst, tá kvoturnar eru smáar sum á Flemish Kap í løtuni.
- Tá nøgdin er ov lítil at fara so langan veg eftir, ber til at býta tann partin, sum vit eiga á Flemish Kap, við kvotu hjá skipum, sum eiga kvotu aðrastaðni.
Men, vænta eigararnir, at tað fer at bera til at fáa íløguna við frystilínuskipinum, sum teir nú hava keypt, at hanga saman fíggjarliga?
- Ja, tað vænti eg avgjørt. Høvdu vit ikki trúð upp á, at vit fáa samanhang í raksturin, høvdu vit ikki havt keypt skipið, sigur Eyðvarur Petersen.
