Eyðun á Borg
Søgufróður maður segði mær nú ein dagin, at hann einaferð hevði skrivað orðið, Sandágerði. Sverri (Dahl) í Sandagerði gjørdi tá vart við, at tað rætta navnið er Sandagerði! Í gomlum skjølum stendur eisini Sandegierde (ikki Sandaagierde).
Á Argjum hava vit altíð sagt Sandagerði. (Tað munnu havnarfólk og øll onnur eisini siga). Í málsligari hugmóð mundi eg halda, at Sandágerði var rættari sum skriftmál, kanska tí, vit á Argjum hava Sandágøtu og Rosságøtu!?
Gerðið við Sandá er sostatt ikki líka rætt sum gerðið við sandin (ella sandarnar).
Gerði merkir trøð ella bøstykki. Meginparturin av Sandagerði er í Havn; ein lítil partur er tó eisini á Argjum (beint uttan fyri Sandá, niðri á bakkanum).
Altso: Sandagerði, eins og Sandavágur!
Annars sá eg ársins fysta tjaldur á Sandagerðisnesi tann 20. februar!
